خطوه لابد منها ولا مفر

اولا اذيكم كلكم والله وحشتوني والمدونه وحشتني وانا نفسي وحشت نفسي مع اني في وشها ليل نهار المهم انا الشديد القوي هو اللي طلعني من هذه القوقعه التدوينيه وهو خبر تاريخي ولازم ابارك وأهني واقول الف الف مليون مبروك لصدقتي الجميله العروسه الاموره( زهور الامل) لانها غاليه عليا وعلينا كلنا ربنا يتمملك علي خير يارب ويسعد ايامك وتبقي في احسن حال وعارفه انك هتعرفي تسعدي نفسك واللي معاكي وتعيشي حياتك زي ما انتي عاوزه ان شاء الله احنا اللي بنمشيها مش هي اللي بتمشينا

علي فكره
(دي الدنيا يعني)

ودي نشيد الزفاف اللي انا نفسي بحبه اوي وبهديه ليكي وبقلك

عارفه انك في الوقت ده في وسط راسك ومش فاضيه بس حبيت اشاركك

واقلك اننا كلنا معاكي مش في الشقه يعني لا

وبركاتك ياشيخ دعبسسسس حييييي

(.
بالمناسبه الحلوه دي لازم طبعا ميفوتنيش افتكر حجات عن زمن الفن الجميل وهما موقفين كل ما افتكرهم اضحك علي نفسي اوي مرتبطين بالافراح اولهم خالتي كان زفافها وانا كنت مرتبطه بيها اوي اوي لدرجه فظيعه لدرجه لما كان خطيبها بيجلها في البيت وانا عند جدتي مكنتش بطيقه طنط عاوزه اعمل بي بي طنط عاوزه انام تعالي نيميني طنط عاوزه اشرب عشان متقعدش معاه وخالي كان بيسلطني ويسبني عليها شكله كان بيغير منه هو كمان
بصراحه مكنش طيقني نوهائي وليه حق بس بقي جه يوم الفرح وكله تمام وخلص الفرح وجينا للحظه الحاسمه وانا بعبطي مأهبه نفسي اني هروح مع العروسه بمناسبه ايه متعرفوش المهم اني معاها في العربيه وخلاص وبعدل فستاني وشعري وبستعد الفرح شطب وكله بيهني ويبارك وبيسلم وماما لقتني لازقه لخالتي وماسكه في ديل الفستان وبسلم علي المعازيم معاهم وهوب خالتي جت تركب العربيه ورجلي سابقه رجليها ولقيت اللي شددني من افايا علي فين ياسمكه وانا بكل سذاجه ايييييييه ريحه مع خالتو رايحه فين ياموكوسه وهوب ومن هنا لقيت بقي الدنيا بتلف بيا وامسك وخد عندك وحلق وانا اعيييييييط وارفص في الارض عاوزه اروح معاهم (انام معاها وانام مع الشهود) ماما يهديكي يرضيكي ابدا مينفعش يابنتي لالالا استحاله ولقيت بيشلوني عنفوانا وخالتو بتبص عليا وهي حزينه ومش راضيه تركب العربيه وانا صعبانه عليها والله شوفي لو اي عروسه تانيه ما هتبقي في دماغها دلع العيال الصغيره وتقول في سرها ياشيخه انا نقصاكي وتذغدني لكن هي ام ام يعني ومن هنا بقلك بحبك يا خالتو والله خالص وبعد ما كله كان بيسلم اتفرجوا علي الموقف الدرامي ده فضلت بعدها نفسيتي تعبانه حوالي اسبوع اه منا كان عندي دم وانا صغيره ولما راحوا يباركوا مردتش اروح معاها ال ايه غضبانه وطنط لما عرفت اني مش معاهم عيطت لانها كان روحها فيا بس طبعا جوزها مكنش بيطقني اساشا ليه حق منا كنت غتته ولزقه في كل حته وري مراته مكنتش بسبهم

ويشاء القدر وتلف الدنيا ودين تدان عند خالتي بنتين زي العسل اللي هي كنت بقلكوا ادعولها دي الحمد الله السنه دي ربنا وفقها ودخلت طب ومن الاوائل وبنوتتها الصغيره فروحه اللي بحكلها حوديت اقصد اللي بتحكيلي حدويت دول الاتنين مرتبطين بيا ارتباط فظيع اما نشوف في فرحي بقي ان شاء الله هيحصل ايه

(:
الموقف التاني بقي
بردو كنت عند جدتي وكان فرح معارف لينا من بعيد المهم تيته خدتني معاها وشبطت انا ودخلت بقي وهما بيوضبوا الاكل للعرايس عشان يودوه عندهم في البيت كانت العروسه اموره اوي انا فاكرها وكنت انا قصيره اووووي زمان بقي لما كنت لسه صغيره فكان الاكل بالنسبالي ضخم وحجات كبيره المهم وانا واقفه زي اطفال الشوارع بتفرج من بعيد علي المشويات والحجات ابص ياجماعه الاقي ديك رومي من اللي قلبكوا يحبه ومحمر ومشمر وشويه وبط وشويه وحمام ومشويات وانا اصلا بموت في الحجات دي كلهاوالاكل رحته حلوووووووووه حلوه بجد وصواني حجات كتير اوي مش فاكره انواعها من كترها كان سفه يعني معرفش العروسه المخفيه والعريس المنيل هياكلوا كل ده امتي وازاي وكل اللي جه في دماغي وقتها ان ده كله هيبوظ غير انه من عيني اساسي بس عشان كله مستوي وكتير علي فردين بس وانا قاعده اتحسر وابص للي بيعدي من ادام عيني وهعييييط واللي بيعدي من جمبي وانا واقفه بتحسر علي اللي عدي من تحت ايدي ولقيت نفسي ركنت علي الباب وقلت في سري ااااخ كده هو انتي هتجوزي امتي يابت يا سمكه عشان تاكلي الاكل ده كله امتي بقي؟ امتي؟ اه وربنا يومها اتمنيت اني اتجوز في التو واللحظه واكبر حالا ولا مكبرش اتجوز وانا زي منا المهم اكل الاكل ده وابقي عروسه بقي وكل اللي مسيطر عليا ان الجواز ما هو الا ديك رومي وبط وحمام وفراخ وشويه مشويات في كده ونبي طب مهو الجواز زي الفل اهو
وفي حين سرحانه في المستقبل وبفكر بصيت لقيت العروسه بتعيط بقي دموع الفراق قمت قلت في سري بتعيطي علي ايه يا منيله يوه تتك الف نيله هو في حد يبقي عنده الاكل ده كله ويعيط اه شوف شوف كهن البنات عبيطه دي بتعيط يارتني ياختي كنت مكانك(: وانا عماله بحقد وبقر ومش طيقاها وبصالها ورافع حاجبي وبصلها بقرف
واخده بالك يازهور اوعي تعملي زيها وتعيطي ومتدنيش حته من الديك الرومي ماشي؟
ربنا يتمم بخير يارب ويجعلها حياه جديده جميله عليكي ان شاء الله
وونبي الله يكرموا اللي متجوز وبيشتكي من الزواج وهيقعد يكلم ويلوكلوك ويقول معرفش ايه يسكت خالص ميقلقش النبت الحياه جميله وزبادي في الخلاط واهم من ده وده انك ترضي ربنا في كل خطوه وصوبعنا مش زي بعضها واحنا بادينا نقدر نسعد نفسنا وبأدينا لاء بردو وانا بركز علي الكلمه دي كتير ليه عشان عن تجربه مش في الجواز لاء في الحياه كلها لازم الانسان يبقي هو المسيطر وده مش كلام في الهوي نوهائي الحمده الله الواحد مهما كان بيحزن اه وحجات كتير بتروح منه ففي حجات كتير احلي واحلي بيحصل عليها وتعوض الحجات اللي راحت وربنا بيعوض ربنا حنين وكريم ورزاق الاهم رضي ربنا علينا وان احنا نتقي ربنا في كل حاجه بنعملها في حياتنا طول ما احنا بنراعي ربنا وفاكرينه ديما هيحفظنا ويرعانا وحياتنا هتبقي عسل وجميله وزي الفل وكلها تفائل حتي لو في شويه كئابه وحزن لازم منهم عشان لما تيجي الفرحه نفرح بجد ونبقي مشتاقين للفرح ده ونستمتع بكل لحظه فيه والله سواء فرح او حزن فهو خير من رب العالمين وراضين ومبسوطين ان شاء الله

خالي بالك من نفسك ومن عريسك ومتنسيناش

اديني حته من االللي هنااااااا ده ايون لاء لاء مش دي ايووووووه الحته دي

الف الف مبروك يا اجمل العرايس

سمكتك الواحده