بستحي

الموضوع ده كنت عاوزه اكلم فيه كتير بالخصوص انه اتكرر معايا وانا شحطه كبيره كده الا وهو بقي ايه؟

نسمي الله كده ونتوكل علي الله

نرغي اصل وحشني الرغي

ايدك يابت انتي وهي خليني اتعدل كده واركز وانا بكلم ايون الله يكرمك يارب

باااااااس حاسبي

ها شيفني كده؟

زمان وانا صغيره مش زمان اوي يعني خماشر سنه كده

كانت في حاجه غريبه اوي بتحصلي كده لالا متقلقوش عليا جيلكوا في الكلام اهو اهدي انت وهي الله بقي

سعات كانت ماما بتودينا المدرسه لما بنتأخر وديما كنا بنتأخر فبتالي ماما كانت بتودينا المدرسه طبعا نسمع الرديو الصبح برنامج بصبح عليك واول ما الست تقول فنوتستيكا الهوبه ياولاد

الايعني ايه فونتا ستيكا؟؟؟؟ ماعلينا

كنت وانا ماسكه في ايد ماما وطبعا في دنيا تانيه وماشيه بضرب النار بالعافيه مغمضه عين ومفتحه التانيه واسب والعن في اللي اخترع المدرسه والناس اللي هناك و اللي هتصدع دماغنا دي بلاهم وبيكلموا كلام مش فاهمها

كان ديما في شارع المدرسه بيلفت نظري ست قاعده علي الرصيف بعيد عجوزه بس وشها مريح اوي وسمح فكنت بحب ابصلها ديما وانفصل بقي عن العالم الخارجي والهم اللي مستنيني ده

بجد معرفش ايه اللي كان بيشدني ليها وبردو معرفش ليه انا حبيت اكتب عنها وليه فاكرها لحد الان

فكنت كل يوم بقوم الصبح واروح المدرسه عشان بس اشوفها وابصلها والغريبه والله مش بهزر كانت بتبصلي بنظره عمري ما هنساها اه يا ولاد كان بينا كلام عيون وحركات بقي وكده كنت حاسه ان بيني وبينها حاجه انا بس محدش غيري لكن معرفش ايه هي(وش بيغمز) مع ابتسامه كده جميله لالالا عندك انتي وهي وهو محدش يفهمني غلط انا بقولكوا اهو عيييب عيييب افضل طول الطريق ملوحه لحد ما تختفي من ادامي خاالص بس لاسف مكنش بشوفها وانا مروحه هي الصبح بس

كنت بحب اروح متاخره المدرسه عشان اشوفها لدرجه ان كذا مره اتمنيت اسيب ايد ماما واجري اقعد جمبها علي الرصيف واتكلم معاها والله مش عارفه حباها بس مكسوفه او طفله مش عارفه هي شحاته يعني بس كانت شكلها نضيف مش زي اي حد وشكلها طيب وفيها حاجه مميزه مختلفه عن اي شحات تاني كنت كل يوم اتمني اقعد جمبها وافلت من ايد ماما واجري عليها اكلمها حتي كنت بحس انها حاسه باني عاوزه اقولها حاجه اكلمها كانت مشفقه عليا اكونش بحبها يالهوي الحمد الله لحقوني وانا صغيره(وش عينه رايحه جايه)

ايه البت العبيطه دي اللي تحب لقمه قاضي وتحب ست عجوز عليكي حجات ياسمكه البت دي واضح من زمان عندها فراغ عاتشفي ايون اكاد اجزم

لحد ما كبرت طبعا واختفت مره واحده ومبقتش اشوفها وكان نفسي اكلمها او اي حاجه كان شعور غريب وزعلت بقي اني مبقتش اشوفها تاني وبقيت ماشيه حزينه ومفتقده حاجه كنت بقول لنفسي كان فيها ايه لو حتي كلمتها ولا قعدت جمبها او عملت اللي كان نفسي فيه كان هيجري ايه بس كنت مكسوفه او يعني ازاي يعني لوعملت كده وكلمتها هقول ايه ؟ ايه العبط ده

بس بقي جيت دلوقتي كبرت وانا ريحه الشغل بالصدفه لقيت ست عجوزه بردووفيها كتير من الست دي صدفه غريبه وضحكت مخدتش في بالي منها في الاول بس لما بقيت اشوفها كل يوم الصبح ارتبطت معايا بالست بتاعه زمان وبقيت اديها هي بس او احب اعدي من نفس المكان وكل يوم اروح عليها اديها اللي فيه النصيب لحد طبعا ما عرفتني بس مفيش كلام يعني غير دعوه حلوه وبتاع وانا مش ببصلها

فكل مره عاوزه اتصاحب علي الست معرفش ليه يمكن عشان اعوض حاجه فتتني زمان عارفين الغريبه ايه ان هتكلم اقول ايه ولا هحكي في ايه ولو حد شفني يقول عليا مجنونه دي ولا ايه !

الحمد الله انه مش شحات زي ابو لحيه(وش بيغمز) ربنا ستر

زي بظبط بظبط لما تشوف ممثل او حد مشهور اوي من اللي بتشوفهم نجوم من بعيد تحس انك بتحبه وعارفه كويس بس مفيش بينك وبينهم اي حاجه او صعب انك توصلهم لانهم من عالم تاني مش شرط ممثلين اهو تصوروا بقي الشحات والمشهور اوي

او اللي فوق اوي واللي تحت اوي مشتركين في حاجه واحده

انك متعرفش تتكلم معاهم او توصلهم!!!

كنت بمشي مع صحبتي وتفضل تضحك عليا تقولي ياله عشان نعدي علي صحبتك ابتسم لها واقولها وانتي مالك

وتقولي والله لافضحك واقول مصاحبه الشحاته اطلعلها لساني بغيظ

وفي مره قلت لا بقي انا هفضل مكسوفه من ايه انا مش هعمل حاجه انا بس هبتسم واقولها صباح الخير وفيها ايه يعني ايه العبط ده ياسمكه متعملي مره اللي نفسك فيه هي مش واحده عاديه يعني هو لازم الواحد يدي للشحات وهو مكشر او مش مهتم بيه او مش باصص له اصلا ليه يعني عادي بقالي اصلا فتره كل مره بعدي وخلاص بقي بقينا ولاد منتشقه واحده وزمل بت اتشجعي كده وقوليها صباح الخير وأبتسمي كده وخلاص بطلي هبل بقي اتشجعي هو انتي ديما خايبه كده في كل حاجه خيبه ايه دي ياختي المهم اتجرأت كده وروحت عليها في يوم واديتها حاجه وروحت مبتسمه وقولتلها صباح الخير وابتسمت الست ما صدقت ياصباح الفل يا صباح النور يا صباح الورد ودعت كميه دعا يومها عسل عسل مشيت كام خطوه كده وقولت يس هو ده وكاني فوزت وطول اليوم كنت فرحانه بقي عملت حاجه نفسي فيها من زمان ممكن تكون تافهه ممكن تكون ملهاش معني ممكن اوي يكون كل ده عبط او ملوش اي لزمه او حد يقول طب واحنا مالنا طب استفادنا ايه طب وبعدين

بس انا اتبسطت سمكه عملت حاجه عاوزه تعملها وهي بتستحي وبتتكسف

اسبكوا بقي مع هذا الفاصل مع هذه الاغنيه اللي بتعبر عن مشاعير ومحاسيسي اغنيه رومانسيه ماشيه مع الموقف تومام وكانها مكتوبه ومتغنيه لسمكه اه ماشيه مع الموقف انا سمعه حد من بعيد مش عجبه الكلام

اه الموقف غايه في الرومانسيه ودي بقي رومانسيه سمكه ان كان عجبكوا وماشيه بظبط مكسوفه وبستحي وعاوزه اوقول كلام لحبايبي دول ومعرفتش اقول والست اليسا بتعبر عن حالتي الله يبارك لها ست كمل

حد عنده مانع؟ والست العجوزه هي اللي بتقول الكلام ده عني انا(وش بيستهبل)

حد عاوز يقول حاجه

أه ..بحسب.!