بدر الصباح

صباح الخير
صباحك صبحنا رز بلبن وطبخنا وكان الوقت بدري كلنا وانشرحنا
صباح الخير
قبل تزقزق كل الطير قبل تقوم العيانه والعفنانه والوش الشين
بصباحك يتفتح ابواب رشيد تجيلي منها كل الخير
يصباحك عندنا احلي من المال واحلي من الغنا
واحلي من سعي البحيره جي كله عندنا

تخيل نفسك بقي تقوم علي الكلام اللي زي العسل ده اللي مكنش مفهوم وقتها بس الابتسامه والوش البشوش تعرف ان ده دلع فيك وصحصه كده الصبح
علي ايد حنينه وطبطبه بصوت مسموع ووش صافي وحضن دافي ايه الحلاوه دي يابت ياسمكه منتي بتعرفي تتكلمي اهو حلاوه حلاوه


افسر بقي الجملتين دول
صباحك صبحنا رز بلبن وطبخنا اشمعني رز بلبن معرفش ينكن عشان
كانوا بيحبوه ينكنش ليه! والوقت كان بدري كلنا بسرعه قبل ما حد يشوفنا لاء وايه انشرحنا عارف لما تبقي منشكح كده ومبسوط اهو هما كانو كده لما يقوموا العيال الصغيره. ملناش دعوه خلينا في الشرح يا بت يا مخفيه
صباح الخير ياسمكه ياللي بتقومي بدري حتي قبل زقزقه العصافير
ولون انا كنت ديما وانا صغيره اقوم اصلا علي زقزقه العصافير مش منبه ولا حاجه انا كنت رقيقه ورقيقه يعني اقوم من ايوتها صوت زي ما بقلكوا كده شيفاكي يابت يا حقوديه ياللي هناك وبتمصمصي في شفايفك طب وربنا كنت بقوم علي صوت
العصافير ! المهم ولا هبصلك اصلا خلينا نكمل بلا هم

وقبل تقوم العيانه الست اللي مضروبه عيارين في دمغها وشكلها لا يسر عدو ولا حبيب وهي قايمه من النوم وقبل ما تقوم العفنانه يعني العفشه اللي مش بتبقي غسله وشها قبل ما تنام وقمطه اللايشارب علي رسها ومكشره علي الصبح وعامله كده هو(....) خدتوا بالكوا طيب والوش الشين سألت تيته قالت يعني الوحشه
لما تقومي يابت يا سمكه بصباحك اللي زي الفل ده ابواب رشيد كليتها تتفتح يجي منها كل الخير ازاي معرفش بس تيته بقي وانا واثقه في كلمها طب اشمعنا رشيد

يمكن عشان مشهوره بالسمك وتيته بتحب السمك ينكن؟ ينكنش ليه كله جايز
ياصباحك عندنا احلي من المال واحلي من الغني طبعا اكيد هو اي حد بيقوم من النوم يبقي كده؟ لا طبعا يعني احنا نستني بس تقومي ومش مهم اي حاجه
واحلي من سعي البحيره جي كله عندنا بردو سعي البحيره عندنا يعني رشيد والبحيره كل ده فلوسه عندنا من صحيانك يابت ياسمكه بقي عندك بلدين اهو امال لو نمتي هيبقي عندك كام بلد تاني!!!!!!

طبعا الكلام ده مش بيتقال لسمكه لوحدها بس طبعا ده كان بيدور علي كل اطفال العيله كلها في سن معين ويتكرر نفس الكلام لحد ما تيته تاخد غرضها مننا ونكبر ونبقي أ شحطه
احلي جملتين سمعتهم في حياتي وانا صغيره ولسه الصوت في ودني
اه والله وريحتها المميزه في منخيري وصوتها وانا قاعده علي رجليها وسنده ودني علي كتفها وسمعه صوتها وبفرك في عيني واتاوب وابتسم وانا ببصلها ومنشكحه خالص وعماله اهز في رجلي واحط ايدي علي كتفها واكمل نوم وهي بتطبطب عليا



كانت تيته عندنا هنا من فتره وانا اقرب واحده ليها في احفادها وكانت بتنام بدري جدا وانا لما ببقي عندها متعوده اني اجري انام في حضنهاونقعد نلوك وننم علي خلق الله وتشتم في دي وتدعي علي دي وانا أأمن علي كلمها وتفضل تتكلم عليها لحد ما نروح في النوم ديما محدش بينام جمبها غيري
لما جت المره دي كانت تعبانه شويه وكانت بردو زي ماهي متعوده بتنام بدري فمتعوده مين اللي هيجي ينام؟
طبعا سمكمك
تقوم وهي رايحه تنام الساعه8 بليل
بت يااااااسمكه
ايوه ياتيته
تعالي جمبي يابت
وتعالي عشان تغطيني
حاااااااضر واجري وتقعد تتكلم ولما عنيها تروح في النوم اعوز اتسحب من جمبها بقي الاقيها تقفش في رجلي رايحه فين يامخفيه متقوميش نامي بدري متقعديش علي المخروب ده يابت نامي بدري واصحي بدري
حااااااضر ياتيته وتروح في النوم تاني
واحاول اتسحب الاقيها مسكت فيا اقوم هبده المخده علي راسي ومكمله نوم ولا اعرف اقوم منها لاني لو قمت هتتقمص وهقعد احايل فيها بقي
بس مصلحتها كانت زي العسل وكنت بضحكها وتقولي اوعي كده انا زعلانه بس بقي كانت بتبقي مبسوطه وتتصالح بسرعه مش بتشيل زي الستات بتوع اليومين دول
جتنا الهم وانا قمصتنا سوده كده ولو شهر علي ما نرجع تاني
ربنا يخليها ليا

هرد علي تعليقات

البوستات اللي فاتت بمزاج

ان شاء الله

معلش اني اأخرت

هروب لقمة القاضي

هييييييه هنرجع لوري حوالي عشرتاشر سنه وانا كنت طفله اه يا جماعه كنت طفله زي بقيت الاطفال! كانت كل حياتي تنصب علي هذه الحلوه الا وهي لقمه القاضي كان في يوم من ايام الشتاء الكئيب اللي مطلعلوش شمس انتكهت فيه برأه
الست لقمه القاضي ازاي ؟
ماما يا اخونا كانت عملت لقمه القاضي دي لا وايه بالسكر بالسكر وانا مش بحبها بالعسل و دي كانت كل حياتي
بتصبرني علي يوم دراسي كئيب وغبي ومكنش بحب اروح المدرسه كنت بروح بضرب(ال......) ماما لما عملتها باكل منها وهي سخنه وملهلبه وطبعا بحبها لما تبرد وتباااااات وخدو بالكوا من تبات دي كويس. انا نمت وانا كلي فرح وشوق علي لقاء يوم جديد واني اتقابل تاني مع لقمه القاضي كلت منها اللي كلته وفاضل لي طبق كبير ومرشوش عليه سكر يا حلاوه سكر مش عسل يا خونا قمت من النوم ولقيت حاجه غريبه مش زي كل يوم الطبيعي اني بقوم بالعافيه ولازم شويه دلع وطبطبه ولعب في الشعر الي ان الكتكوته الصغيره تصحي وتفوق بل كانت تغرق في النوم اكتر من الدلع ده بس محصلش ده يوميها !
دخل في قلبي نوع من الريبه والشك قمت علي برنامج بصبح عليك وفونتستيكا والحوارات دي ليها لقاء اخر ان شاء رب العالمين,
روحت المدرسه زي كل يوم بقدم رجل وري ورجل ادام وعايزه اليوم يخلص وسرحانه طول اليوم وفرحانه وقلبي بيدق ومش سامعه اللي حوليا كنت مستعده يوميها اموت او انضرب كله لجل عيونك انتي يا لقمه القاضي اي حد يبهدل فياهسامح, انهارده فري, انهارده مش هشيل في قلبي ولا هكتم خالص كل ده علي امل لقاء اخر بحب حياتي المهم وانا راجعه البيت مكنش بفكر في اي حاجه خالص وكنت بغني اغنيه
ايوه يا دينا ايوه كده عمري مشوفتك حلوه كده( لاستاذنا عبد الحليم ابو حافظ )اه والله بجد مش هزار اي نعم انا كنت عيله بس ايه دماغ بغني الغنيه دي من فرحتي طفله بقي وبتغني( لابوها حافظ )لا ملامه عليها يعني ده حب حيتها لقمه القاضي, يا جماعه تديله كل حيتها وتفرح كنت مبسوطه جدا متتيخيلوش وكنت بغني الاغنيه دي والحياه جميله اذ فجأتن دخلت البيت جريت علي اوضتي بصيت علي المكتب لقيت الطبق يااااه قلبي استريح خدته في حضني رقصت بيه تانجو شويتين, الطبق كان متغطي بفتح الطبق اذ فجأتن الاقي شويه سكر مخضوض وكاشش في نفسه ومشرأب وفي جمب من الطبق وبيبصلي بحسره قلبي خفق واتقبض الدنيا اسودت في وشي سندت ضهري للحيطه نزلت براحه وشعري بينزل معايا طبعا هو كان منكوش وجرح الحطيه وانا بنزل ببطء وممدت علي الارض والطبق علي رجلي وسكت خالص اقولكواحاجه؟ (لما مثلا الست اللي جوزها يبقي مسافر وراجع من السفر بتبقي عامله ازاي وخدين بالكوا وفرحانه ومستقبلها بكل فرح او البت اللي رايحه تقابل الجوبتبقي متشيكه اد ايه وفرحتها ازاي, بس ملناش دعوه بيها خلينا في الست المجوزه حكم انا اموت في الحلال ربنا يهدي سرهم يارب(وش بيغمز) اهو انا كنت اكتر منهم وانتوا عاررفين فرحه الاطفال اكتر بكتير من الكبار المهم جريت علي ماما احكلها علي الفجيعه طبعا قبل ما تنطق بولا كلمه عرفت مين اللي عمل عملته السوده وهرب راح الشغل من غير طبطبه ولا دلع ولا اي حاجه انا كان قلبي حاسس جه باليل بقي ينادي علي سمكه لانها الصغيره ياسمكوتي حببتي تعالي اقعدي علي رجل بابا حبيبك, تعالي يا جميل انا بقي في سري كنت عايزه اجيب سكينه في المطبخ ,واجي عليه واروح بيووو. خد. ترخ. وفي سري بقوله سموكه ايه يا ابو لقمه القاضي انت يا اكل مال اليتامي وبصتله بصه مش طيقاه يا ناس, خلاص فرق بيني وبين حلم حياتي اجي فين يا راجل انت بعد ايه ضحكت علي لقمه االقاضي بأيه خليتها تهرب معاك وتسبني في بؤسي اغرتها بأيه ايه فيك احلي مني عشان تكلها انت اخص علي ده زمن اخص , بجد قعدت بقي سرحانه وزعلانه وكتمه في قلبي والموقف ده منستهوش طول حياتي وزعلت جدا ومقلتش لحد غير لما كبرت وروحت حكيت لماما زعلت وقالتلي ياحببتي طب مقولتيش ليه كنت عملتلك بدلها وراحت قالت لبابا زعل جدا وشال الذنب وكل شويه يقولي بجد يا سمكه ومتزعليش وكان عايز يجبلي وبجد زعل جدا وانا اضحك واقول ايه يا جماعه ده انا بهزر ده عدي عليه عشرتاشر سنه وبابا اثر فيه بس بعد ايه مهو اثر فيا زمان يحس شويه باللي كان فيا وتعبي وحرتي ايام وليالي عشان انسي لقمه القاضي والايام تداوي الجرح ووصلني لمرحله الشرب عشان انسي شربت سحلب وينسون ولبن بالعافيه عشان مكنتش بحبه
ومن يوميها عشان اتخلص من العقده لما ماما تعملها اسيب منها واحط الطبق علي المكتب وانام واقوم الصبح وعلي الله حد يقرب ليه وبالفعل محصلتش بعد كده وكانت بتستقبلني لقمه القاضي ابهي استقبال واحنا زي السكينه في الحلاوه مع بعض

في حاجه عايزه اقلها من الكلام ده ان الاطفال بجد اي موقف سواء بسيط او قوي بيتحفر في الذاكره ومش بيتنسي ممكن يكون بالنسبه للكبار حاجه بسيطه بس بالنسبه لااطفال كبيره جدا وبتأثر فيهم اه والله ومش بتتنسي نهائي اسألوني انا رغم انه موضوع مش مهم بس انا فكرها لحد الان فاي حد عند ه اطفال ياخد باله كويس من اللي بيزعله او اللي بيضايقه ويهتم مش يقول دول اطفال ,مبيطلعش البلاوي كلها غير من الاطفال, الاطفال اذكي بكتير من الكبار
بس انا ديما لحد الان بحس ان لقمه القاضي حد غالي علياا
ده انا لو مش بنت حلال مصفي كنت ارتكبت جريمه
بعدك شمس بتبكي
يالقمه القاضي ياختي يا حببتي

كلام حكيم

توجهت الي حكيم لاسأله عن شئ يحيرني

فسمعته يقول(عن ماذا تريد ان تسأل؟)

قلت(ما هو اكثر شئ مدهش في البشر؟)

فأجابني :البشر! يملون من الطفوله, يسارعون ليكبروا,ثم يتوقون ليعودوا اطفالا ثانيه

يضيعون صحتهم ليجمعوا المال,ثم يصرفون المال ليستعيدوا الصحه

يفكرون في المستقبل بقلق ,ينسون الحاضر, فلا يعيشون الحاضر ولا المستقبل!

يعيشون كما لو انهم لن يموتوا ابدا,ويموتون كما لو انهم لم يعيشوا ابدا

مرت لحظات صمت.............

ثم سألت (ما هي الدروس الحياه التي علي البشر ان يتعلموها؟)

فأجابني:

ليتعلموا انهم لا يستطيعون جعل احد يحبهم, كل ما يستطيعون فعله هو جعل انفسهم محبوبين

ليتعلموا الا يقارنوا انفسهم مع اخرين

ليتعلموا التسامح ويجربوا الغفران

ليتعلموا انهم قد يسببون جروحا عميقا لمن يحبون في بضع دقائق فقط, لكن قد يحتاجون لمداواتها سنوات طويله.

ليتعلموا ان الانسان الغني ليس من يملك اكثر,بل هو من يحتاج الاقل.

ليتعلموا ان هناك اشخاص يحبونهم جدا ولكنهم لم يتعلموا كيف يظهروا او يعبروا عن شعورهم

ليتعلموا ان شخصين يمكن ان ينظرا الي نفس الشئ ويريانه بشكل مختلف

ليتعلموا انه لايكفي ان يسامح احدهم الاخر, لكن عليهم ان يسامحوا انفسهم ايضا

قلت بخضوع شكرا لك.

وانا كمان قلت كده

(منقول)

كمان حاجه جميله
اللي عايز يبقي مخلص
(ميعوزش غير ربنا سبحانه وتعالي)
واللي عايز يبقي طاهر من جوه
ميكونش عايز غير ربنا سبحانه وتعالي
وكل اعمالنا خالصه لوجه الله سبحانه وتعالي
وابتغاء مرضاته


بت يا سمكه انتي يابت بت يا مخفيه اللهي تتخبطي في دماغك يابت
تعالي نامي نامت عليكي حيطه يابعيده
حااااااااااضر جيه اهو جيه انا جيت اهو (قطيعه) ايه الناس دي!
معلش يا جماعه مش هقدر اقولكوا اتفضلوا معايا الوقت اتأخر
واللي عايز مينضربش ولا يتسحل من افاه يسمع كلام ماما بسرعه
سلاااااااااام