مكنش ده قصدي

جاء في "البخاري" أن : رجلان من المهاجرين والأنصار تشاجرا
فَقَالَ الأَنْصَارِىُّ يَا لَلأَنْصَارِ. وَقَالَ الْمُهَاجِرِىُّ يَا لَلْمُهَاجِرِينَ
فَسَمِعَ ذَاكَ رَسُولُ اللَّه صلى الله عليه وسلم فَقَال/ مَابَالُ دَعْوَى جَاهِلِيَّةٍ
قَالُوا يَا رَسُولَ اللَّهِ: كَسَعَ رَجُلٌ مِنَ الْمُهَاجِرِينَ رَجُلاً مِنَ الأَنْصَارِ
فَقَال/ دَعُوهَا فَإِنَّهَا مُنْتِنَةٌ

*******

عارفه ان الكلام اللي جي ده ممكن يزعل ناس كتير
بس مش كله فهم قصدي من البوست الي فات للاسف

ومتفهمونيش في البوست ده غلط
انا ياجماعه مش ضد ان مصر تفوز بالعكس دي بلدي وبحبها جداااا واحنا شعب غلبان اوي وطيب عاوزين نفرح وخلاص بأي حاجه من كتر المشاكل اللي عندنا والهم
بس المسأله توصل لتشريد ناس وضرب وخبط وتهديد اسر بحالها في بلد متغربه فيها وزوجات واطفال علشان لقمه العيش ومتحمله غربه وبعد وقرف و مهانه والله اعلم بيهم هناك لاءلحد هنا يبقي استوب تولع الكوره ويولع كاس العالم
سوري يعني لعيبه الكوره كل واحد فيهم هياخد 4 مليون الهم لا حسد ولاحقد ده قر بس

ملحوظه
(حسبي الله ونعم الوكيل)
ربنا يباركلهم يارب بس بجد احنا يارب يفوزوا يارب مصر تكسب ولما تكسب هناخد ايه احنا؟لادي هتدي لكل واحد فيهم 4 مليون
منين بقي ؟ده مربط الفرس, من فلوسنا احنا من مصر ياعبله يا اخي انت وهو 4 مليون اكلوا الناس اللي مش لاقيه تاكل جوزوا الشباب اللي هتجوز علي نفسها دي
تيح ياعم شرفنتيح فرص عمل كويسه للشباب اتلهي علي عينك وصلح السكه الحديد اللي بتموت الناس واحنا بقينا عاملين زي فيران التجارب يجربوا علينا خرده بيشتروها من بره
بلاش وفرلهم كوله يشموها طيب
من حق كل واحد فينا يعيش كبني ادم محترم راقي في بلد تحترمه وتحترم فكره

ليه بلدنا كده ليه مش بنحترم اهل البلد دي وديما الاولاويه للاجانب نرصف طرق عشان شلولح جي من بلده نبني مدرك ايه عشان شوشي جايه من بلدها نرمم ابصر ايه عشان زغلول جي من هناك
طب وصفيه ومتولي مش من حقهم يستمتعوا ببلدهم وينعموا بخيرها!
لا اسمع بقي

مدن في فرنسا فيها عدد من الجزائرين بعد انتهاء المباره قاموابتحطيم المطاعم التي يمتلكها المصرين
و7 مراكب نزه بحريه وتحطيم 17 سياره ملك لمصرين مقيمين في فرنسا ليه كل ده وانا اللي كنت فاكره ان احنا بس الي

متهورين ومتعصبين وهنكسر وهنعمل طلعنا محترمين والله
انا مش بقول ان الجزائر كلها كده, اللي عمل كده شويه حوش ومتخلفين, طبعا في ناس كتير محترمين وملهمش ذنب في كل ده بس لما شوفت كده قلت طب منتشطر بدل ما نحدف طوب في بعض ونهز طولنا كده ونحدف الطوب ده في اسرائيل بدل ما بنضرب بعض ونقعد نشتم في بعض ونقول علي بعض متخلفين وكل دوله عربيه تقولك العرب دول متخلفين فين الوحده فين الترابط ياشيخ بلا كلام فارغ

وناس مصرين محتجزين في الجزائر في البيت وبيحدفوا عليهم قنابل وطوب وحرقوا مكتب الطيران ومحتجرزين موظفين في شركه اتصالات هناك

ليه كل ده ايه التخلف اللي العرب بقت فيه والهيافه دي

عشان ماتش كوره !!

ينهار ابيض

ذنبها ايه الناس دي كلها مين بقي اللي حيحميها وياخد حقها ناس لا بيها ولا عليها

ومحدش مدي اعتبار لمصر ولا المصرين ليه بقي افهم؟

تعالي بقي لوزاره الخارجيه والسفاره عشان تلحقهم

بيقولولهم الصباح رباح متأفورش الحكايه ياجماعه

النهار ليه عنين

كل سنه وانت طيب

فوت علينا بكره
لا وتعالي اسمع خبر تاني يسعدك
ان السعوديه محتجزه 62 مصري بتهمه تهريب ايه خدلي بالك بقي
صواريخ وبمب العيد ياحلولي وشويه يقولولك تهريب معسل!

ومحدش عارف ايه سبب اعتقالهم اساسا
ودول شباب في قريه في مصر سافروا يشقوا طرقهم عشان الفلوسسسسسس عشان ايه؟ الفلوس
واهم مسجونين هناك
بجد ده حرام
وقبل كده كانت لبيا البلد العسوله كانت محتجزه مصرين في السجون بردو سافروا عشان يشتغلوا هناك بردو عشان الدخل المصرين متهانين في البلاد العربيه ليه؟

وكل ده لو كان الدخل بتعنا كويس ومرتحين مديا وبلدنا مرفولنا الامان المادي والحريه والعيشه الطريه مكنش حد هج وساب البلد ويدور علي فرص عمل كان زمنا دلوقتي بنروح البلاد دي فسحه او تغير جو ونروح فرنسا نشوف احدث موضه ونجيب كلونيا وافتر شيف من هناك ونروح دبي نركب بسكلته ونجيب بيجمتين صيفي علي شتوي علي عبيتين خليجي ونروح المغرب نقعد في طشت مغربي نستجم ونرسم تاتو وحنه

مش نرجع بمروحه وراديو

ونرجع من لبيا بميكروباص يالي علي الرتعه حود علي المالح

وكان زمنا دلوقت بنطلع لسانا للجزائر ونغظهم واحنا تحت البطنيه امو طبقتين مدفيين ونقزقز لب وننفخ في قشر السوداني بس حاسب ياواد راس اخوك ملتها قشر لب وسوادني الله يقطعك يابعيد ومش خيفين علي حد لينا هناك
يبقي انا ميهمنيش بصراحه مصر تكسب ولا تخسر والاقي اهلينا في بلاد تانيه بتتضرب وتموت عشان شويه حوش وشويه متعصبين متخلفين يولع الكوره وكاس العالم
اه بحبك يامصر ويارب تفوزي يامصر
بس نفسي تفوزي في حجات كتير تانيه اهم

لما شوفت شكل الناس في الشارع والحماس بتاع الشباب وجنبهم البنات واخد بالك هلي روح التعاون والوحده والمشاركه الوجدانيه ومحدش بيبص لحد ولافي تحرش اعوذ بالله

والله اعلم بقي في الزحمه بيحصل ايه احنا مش في اتوبييييييييس يا.....
قلت ياسلام لو الحماس ده يستغل في نزول لصلاه فجر ولا في حرب ضد الصهاينه ولا في تغير وضع مقندل مش موفقين بيه ونشتم ونسكت ولا حاجه تنفع بلدي
وتنفع اهلنا احنا عندنا ناس حلوه اوي وشباب زي العسل وحجات كتير جميله في البلد دي

اخر جاحه لفتت نظري وانا بتفرج علي لقطات لتشجيع المصرين في التلفزيون للكوره وطبعا برقص بقي بلدي بحبها كل حته في بلدي, بلدي ياوله ياسلام علي اهل بلدي لقيت ايه بقي خد بالك معايا انت وهي بنات حلوه اوي وشكلها وشعرها اصفر جم منين دول ياض انت وهو فرحت اوي اوي اوي

حاجه مبهجه بصراحه

شعرت ببهجت
قلت لاختي الحقي يا بت ده احنا بقينا زي لبنان اهو بنات مصر بقت وجميله مره واحده كده
ياحلاوه ياولاد ولا وحده طلعت منحسه ولا مصديه لا كله جميل وحلو وبيقولوا مسر مسر مسر ورسمين علي خدودهم علم ياختي كميله حبيبه امو خدودو انتش وبيسرخوا ايه الحلاوه دي ونبي قمرات يابنات انا عن نفسي فرحت قلت شكلنا حلو اهو ادام العالم

المصريات زي القمر

ياخرشي

تاترتتا ترتتا ترتتا

مسر

كلمتين محشورين في زوري مكنتش هنام كويس لو مقلتهمش

ياريت نخسر كل مباريات الكوره بس نكسب نفسنا
شكرا شكرا مش عاوزه تسقيف
ده اقل حاجهعندي

بجد زعلانه

(وش حزين)

بلدي

متقولش ايه اديتنا مصر

قول هنيدي ايه لمصر!!!!

انا عن نفسي هدي كتيييييييييير بصراحه

بس

يعني

يعني

كده

حد يساعدني

الله يستركوا

(وش بيغمز)
(.

تاترتاتا

مصر

عارفة إنك طيب

ابو لحيه

ابو لحيه
دي بقي حدوته تيته المفضله اللي كنا بنام عليها زمان واحنا صغييرين

اصل كنت عند جدتي وبنت خالتي فرح صغيره جت تنام جمبي عندها 4 سنين وانا عارفه هي تقصد ايه من نومها جمبي قبل ما تتعشي بيا قلت اتغدي بيها

ازاي بقي؟

قلتلها فروحه متحكيلي حدوته قالتلي حاضر وقعدت تهبل وانا اضحك واخبي وشي منها في المخده عشان لما بتعرف اني جايه بتجي وتنام جمبي وتقرفني بقي فقبل ما تخلص الحدوته قلتلها فروحه متحكيلي كمان حدوته كانت هتعيط وانا عامله فيها الطفله واستهبل عليها وهي الكبيره اصلها بتعمل فيا كده وتخليني احكي كذا حدوته وانا بتخنق ومكنش ليا نفس احكي حاجه وبهبل وهي بقي عبطت اكتر وتعبت وانا اقلها ها كملي وبعدين وكلمها يموت من الضحك وزهقت ولقتها قامت من جمبي تتفرج علي التلفزيون

افتكرت وقتهاصبر تيته علينا وتحملها لينا وانها تحكلنا كتير ومتملش ابدا

تيته بقي كانت تلمنا حوليها وننام جمبها وتحكي
تيته تيته
نعم ياسمكه
احكيلي حدوته ابو لحيه للمره 100
مش انا حكتهالك قبل كده
عشان خاطري ياتيته
حاضر ياسمكمك
تعالي كده في حضني وسيبي شويه مكان عشان اختك تعرف تنام

بس يابت بطلي ترفسي في اختك تعالي جمبي هنا
اي اوعي شعري يرخمه اي اي سيبي اوعي ايدك مش شايفه تيته
تعالي هنا ابعدي عن اختك عشان احكيلك وبطلوا عشان مزعلش منكوا
خلاص ياتيته انا سكت اهو والله احكي بقي ياله
كان ياماكان ياسعد يا اكرام وما يحلي الكلام الا بذكر النبي عليه الصلاه والسلام
قولي ياسمكه عليه لاالصلاه والسلام
حاضر عليه الصلاه والسلام ها ياله بقي ها
تضحك تيته وتقولي طيب طيب
كان في زمان ايه اميره جميله وعايشه في قصر كبييييير وواسع وكانت عايشه مع باباها الملك معرفش اسمه ايه مش فاكره بقي الله!لكن كل ما يجي عريس يتقدم ليها ميعجبهاش لا اصله طويل اوي لاء اصله قصير اوي لا اصله تخين لاء اصله رفيع لا اصله اسمر لاء اصله وحش وكل ما يجي حد يخطبها تطلع فيه حاجه ومتوفقش باباها غضب منها اوي واضايق وقالها والله تالله بالله لوجه ان شالله شحات علي باب البيت انا هوافق عليه وهتتجوزي غصب عنك في الوقت ده بقي كان ال يعني الامير الحليوه معدي من عند البوابه ال يعني سمع الراجل الملك هو وبنته وهو بيتخانق مع بنته فعرف ان باباها حلف عليها ان لما اول واحد يخبط علي الباب وطلع شحات هيجوزهولها وهو بقي شكله كده كان بيحبها ده انا اللي بفسر الحدوته يعني وخدين بالكوا؟
المهم طلع يجري الامير واتخفي ولبس لبس شحاتين ولحيه ومسك الزماره وقال ايه
تورترتو تررتتتوتو
في اللحظه دي احلي قطعه في الحدوته لما كانت تيته ترفع اديها وتعمل الصوت ده ال يعني ماسكه زماره وافضل وتلعب ايدهااضحك بصوت عالي وهي كانت تذود عشان بتضحك علي ضحكي

انا كنت بتمزك اوي لما اسمع الصوت ده
جه بقي الملك نادي علي الخادم وقاله نادي الراجل ده وهو بقي بلحيه متخفي يعني
ولم هدوم الاميره معرفش بقي لمها في بؤجه ولا في سره بس سره ملوكي بقي ولا ايه وادها للشحات ابو زماره ترترتوو ترتتوتو ها وخدين بالكوا؟
اول يوم بقي خدها في كوخ صغير وحصيره وقالها لازم تتعودي علي المستوي ده لان انا علي اد حالي وهتقومي معايا الصبح نبيع اطباق في السوق
قامت الصبح الشحات ادها كام طبق وقالها تقعدي هنا تبيعي لحد اخر النهار وانا هاجي اخدك
المهم وهي قاعده تبيع ومش عارفه تعمل حاجه جه فرس من بيعييييييد بيجري يجري هوووووب كسرلها كل الاطباق فضلت قاعده تعيط جمبهم جه جوزها وقالها مين اللي عمل كده حكتله
خدها وروحوا البيت تاني يوم الصبح جبلها شويه كوبايات وخدها علي السوق الصبح
ونفس الموقف حصل ده الراجل بقي بتاع الحصان ده رخم اوي
جه جبها غزل وقالها انسجيه ووديه السوق وبيعيه معرفتش تغزله
جت قعدت في البيت قالها اكنسي قالتله ولا اعرف
طب اطبخي الاكل اللي جبته ده قالتله ولا اعرف

وعشان تراضيه جت تقطع معرفش ايه بالسكنيه اديها كلها اتعورت وقعدت تعيط تعيط مهي اميره بقي يا جدعان مش متعوده علي الهم ده بلا نيله
زعل بقي وقالها ولا اي حاجه عارفه تعمليها
وهي ماشيه معاه رجعين من السوق وخبتها موردتش علي حد طبعا مهي خيبه في كل حاجه في البيت والسوق
وهما ماشيين كده لقت قصر كبيييييييير بتقول لجوزها بقي في ساعه صفا كده بتدلع علي الراجل بقي ملكمش فيه الراجل والست بتعته
ال هو قصر مين ده ياسي مرزوق
يرد يقولها ده قصر ابو لحيه
ودي خيول مين

يقولها دي خيول ابو لحيه
والاشجار والجناين بتاعه مين دي
يقولها دي ملك ابو لحيه
يخربيتك يا ابو لحيه ده (انا اللي بقول كده في سري يعني فينك يا ابو لحيه انت بس)
المهم بقي تفضل ماشيه هو شكله وحش ومتخفي وشحات بقي واخدين بالكوا انتوا من غير ما اوضح
خلاص سلمت امرها لله وعايشه في بيتها الصغير المتواضع لا ده كوخ وشحات وعجوز الراجل جوزها ده
فجأه بعد ما اتعلمت الادب واتربت وعرفت ان الله حق ومبقتش تعايب علي حد فجأه
قامت من النوم لقت جوزها بيقولها تعالي وخدها وعلي القصر بتقوله ريحين علي فين
بعد ما طلع عين اللي خلفوها واكيد الباديكير والمانيكير باز
قالها تعالي بس وخدها ودخل القصر تقوله حد يشوفنا انت واخدني علي فين
(وانا مش فاكره بصراحه بظبط الحكايه لانه من وانا طفله ده بقيت الذاكره يا جماعه المهم ياجماعه) انه شال اللحيه وطلع شكله وسيم جدا ولبس لبس الامراء وكل ده وهي مستغربه وقالها عارفه اللي كان راكب الفرس وكسرلك الطباق هو انا وعارفه ان كل القصور دي والخيول دي والمال ده بتاعي انا وان انا الامير شرفنتح بن جولنار
وطبعا تيته تجيب سيره الخيول وانا افرح اوي كاني انا اللي هتجوز ابو لحيه وفرس بقي ومعرفش ايه
وطلع يعني مبيقولش ترترتوت ترترتوتو خالص طلع امير ابن امير بس هو اتفق انه يعذبها شويه ويحسسها ان الحياه معرفش مالها وانها متعيبش علي كل حاجه (وانا لحد الان مفهمتش المغزي من الحدوته)
معتبرتش منها ياخونا اي والله معتبرتش خاااالص ياله ما علينا (وش مبتسم اوي)

انا لو ماكنها وبعد البهدله دي وطلع بيستظرف ومش بلحيه وانه امير كنت انا علي ايدي خليته ابو لحيه وشحات علي حق

ايه الهزار الماسخ ده

بخ انا مش ابو لحيه انا الامير الحليوه

ايه العبط بتاعك ده يا راجل انت

وكمان كانت تيته في نص الحدوته بتنام وتسرح وتقول اسم ماما وعيالها اللي هم خلاني وخالاتي في الحدوته واصحيها اصحي يتيته كملي الحدوته الله لايسيئك الحمد الله انها مكنتش بتجيب اسم جدي الله يرحمه كانت هتبقي حاجه مش لطيفه خااالص وحوسه واحنا عندنا ولاايا بس بقي الله يسهل للجميع واحنا اطفال لا وايه قصر كمان لا بس كنا هنقوم بقي من جنبها احنا عيالزوق وعندنا دم ونفهمها وهي طايره كنا هنخلي تيته تاخد رحتها في النوم ياجماعه مش كده امال لا تيته كانت مودبه مبتجبش غير سيره عيالها ست عاقله عاقه فاضله بصوا من الاخر كومل يعني بصراحه
اظاهر ان تيته كانت عارفه ايه اللي هيحصل بعد عشرتاشر سنه فكانت بتحكي الحدوته دي ودي الحدوته الوحيده اللي ارتبط بيها الواحد
دونا عن الحدواديت كلاتها اه وربنا
بس لحد دلوقتي معرفش تيته كانت تقصد ايه منها
كمان سألت تيته مره لما كبرت بقولها مين ياتيته اللي قالك علي حدوته ابو لحيه دي
قالتلي وهيمنشكحه كده وبتتنهد كده ومبتسمه ان اخوها اللي كان بيحكهالها عشان كان اكبر منها بكتير وكان بيحبها ومدلعها وهي كانت بتحبه اوي وكان عندنا صوره ليه زمان كنت بشوفها اتريق عليه واضحك اصل كان شكله عسول كده هههههه ياله بقي كانت بتزعل بجد وتغضب
اصل تيته كانت بنت علي 4 صبيان وكانت مدلعه اوي ودلوعه وكانت اصغر واحده وشقيه جدا ولا وحلوه اوي ياجماعه اه وربنا كانت اموره كل شوباب الحته بيعكسوها مش زينا جتنا نيله في حظنا الهباب
ووشها بريئ ورقيق لحد الان بحب ابصلها اوي طبعا مش زي زمان
والشعرتين الصفر بتوعها دول
بس من اجمل الستات العوجيز اللي شوفتهم في حياتي ربنا يبارك في عمرها

او يمكن عشان بحبها او انها جدتي شيفاها اجمل واحده في الكون اصلي لما بحب حد اوي بحس انه مفيش زيه

في الدنيا دي كلها

في حاجه كنت عاوزه اسالها لتيته من زمان ومخلياني في ارق كده

اال هو ابو العروسه اقصد ابو الاميره الحج الكمل الملك ابن الاصول مجاش زارها ولا مره من المرات وشاف بنته

الاميره كوكي وهي مسحوله كده!

عاااااااااااااااااااااجل

لا تنسوها من الدعاء

لقد اصيبت المدونه الجميله ايمان قنديل صاحبه مدونه غرام بمرض خبيث

قدر الله وماشاء فعل وقرر الاطباء ازالته غدا الساعه 9 صباحا

ارجو كل من يدخل المدونه يدعو لهاعسي الله ان يخفف عنها و يشفيها

اسأل الله العظيم رب العرش العظيم ان يشفيها

يارب يخفف عنها

وترجع لينا بالف سلامه

ويحفظها من كل شر

ويجعله في ميزان حسناتها

اللهم امين

انا بحبك اوي ربنا ما يحرمني منك

ولا يحرم كل الناس الي بيحبوكي منك

انتي حد جميل اوي

ياغرااااااااااااااام

ان شاء الله ترجعي لنا بالف سلامه

سمكه

اسكندريه دي بتاعتي

شوفتوا مسجد القائد بالنهار شكله ايه

ده بقي بليل وفي ليالي رمضان

اللي عليها علامه خضره ده مكان السيدات دول كتير جدا
وفي كمان اماكن اخري
بس عشان التصوير من بعيد لكن هما ماشاء الله

شوفوا ماشاء الله المسجد مش مكفي بيفرشوا علي البحر وعلي الكورنيش

والطريق بيقف تمام بتبقي كذا محطه ترام

انا اول مره اعرف رغم بصلي هناك بس من الصور عرفت انهم كمان بيصلوا علي البحر نفسه
والكورنيش شوفتوا الواد اللي فوق بيصور ده

حتي الشوارع الجانبيه بتوصل كذا محطه ترام ومن المجمع لحد محطه الرمل ومعرض

كوتا ده طبعا للي عايش في اسكندريه هيعرف الاماكن دي وعارف كل ده انا بقول للناس

اللي خارج الاسكندريه والقاهرويين

شوفتوا الجمال يا قاهرويين

عندكوا كده؟

(وش مطلع لسانه)

انا بقي كنت متلقحه في الاماكن اللي عليها علامه لبني دي كل يوم بنط في مكان شكل بتفسح بقي

مره في حديقه الخالدين ومره عند ماما سوزان المبني الابيض اللي هناك اهو والمكان هناك هادي وجميل

ومفيش زق ولا دوشه بس بندخل بالعافيه ولا مشاكل حكم الستات تموت في المشاكل والهيصه والك الكتير
انا عارفه منقعد في بيوتنا احسن بلا هم

شيفين في الصوره دي وصل لحد فين هناااااااك اهو النور اللي هنااااااك ده

وكل النمل ده بشر

ماشاء الله ولا قوه الا بالله ربنا يذيد ويبارك

بس!!!!!!

ولا بلاش مش بالكتره والله

المهم النفوس البشريه نفسها

ياجمالك يا اسكندريه في رمضان

بس الناس مبقتش زي زمان ومكنش رمضان ده زي رمضانات تانيه من حجات معينه وسلوك معين من الناس زي متقولوا كده مبقاش في خشوع ولا احساس ان احنا في رمضان شهر مختلف لا والله كانت حاجه غريبه جداااااااطلعت منه حزنانه شويه للمواقف اللي شوفتها وشوفت الانانيه بين الناس وبعضها طب ده انا كنت بقول قله الضمير اللي موديانا في دهيه اكتشفت ان في حاجه اسمها انانيه ومحدش بيحب الخير لاخوه الا من رحم ربي شوفت مواقف عجيبه وفين في الشهر الكريم خلتني حزنت حبتين

هو الابتلاء والامراض اللي احنا فيها دي من شويه

ربنا يرحمنا برحمته

امال انا عطشانه ليه بس يا جدعان قولولي

ده انا كمان حزنانه

حد يقدر يقولي اني انا غلطانه دلوقت بزمكتوا؟

ابقي احكي بقي بعدين اصلي مليش نفس الوك

وزمان رمضان زعلان زي انا كمان
ياله ان شاء الله بكره يبقي احسن

اه يااااااانا

عشطاااااااااااااااااااااااااااااااااااااااااااانه

انا حد يقولي اني انا غلطااااااانه

منا بردو ..اصلي انا انسانه

ويارييييييييت

سبحه رمضان لولي ومرجان

تحديث

سلام عليكم كل سنه وانتوا كلكو كلكوا طيبين ومبسوطين ان شاء الله انا قلت الحق اعمل

بوست بسرعه كده قبل ما رمضان ما يقفشني ويطب عليا حتي انا دخلت بليل عشان كان ورايا حجات كتير قلت اسلم واقول كل سنه وانتوا بخير البوست ده كان في دماغي من كام يوم بس مفيش وقت خالص رمضان بقي وانتوا عارفين

رمضان كان زمان هيييه كان رمضان صحيح احلي حاجه ان الواحد كان فاكر رمضان اكل وحلويات وتلفزيون واكتر حاجه علقت معايا عم شكشك في بوجي وطمطم كمان عشان انا واختي واخويا كنت بحس نفسي طمطم واختي طماطم واخويا بوجي بس اللي كنت بستغربله ديما ازاي بوجي وطمطم عايشين لوحدهم مفيش ولا مره باباهم ولا مامتهم موجودين يمكن لكن البت زيزي فاكرنها؟ كانت عايشه مع عمتها كانت رخمه ورزله بس اللي اكتشفته لما كبرت ان كتير قالو ان شخصيتي زي زيزي دي انا كنت بكرها وانا طفله عشان غتته لكن اكتشفت انها نسخه مني

عم شكشك بقي كنت ديما اسرح معاه واغير واتغاظ انه باصص من الشباك ده واتمني اني اروح اقف جمبه في الشباك كان نفسي اشوف بيته من جوه واعيش هناك ليه معرفش؟ ولما كان بيجي لقطه ليه ال اقوم من علي الكرسي ال يعني هشوف بيته شكله ازاي هو وباباه العجوز واقعد ابص يمين وشمال يمكن اشوف حاجه, هطل بقي بعيد عنكوا كمان من صغري وانا بحب اوي الناس الكبيره في السن واحب اقعد معاهم واسمعهم فكنت بعز عمكوا شكشك اوي

انت يا ولد هات العصايا ياولد

وفاكره اول يوم في حياتي اقطع السلاطه مع ماما ال بسعدها كنا في رمضان وصوبعي كلها هي اللي اتقطعت مش الطماطم ولما بقي نشبع نجري ننزل نروح نجيب الكنافه السخنه والراجل بيعملها وانا ابص عليه واشوفه بيعملها ازاي وعيال كتير في الشارع وماشيه تخبط فيا زي الهطل اصلي وانا صغيره كنت هطله وساكته وهدومي ساقطه مش موضه يا جماعه لا ده كان غصب وااتدار يعني من العيال البله(ابله) دول عارفنهم ؟اهو انا كنت منهم

وطبعا قبل المغرب نسمع الشيخ الشعرواوي ومكنتش بفهم منه حاجه بس بابا كان بيحبه اوي فكنت بقعد جنب بابا وهو بيسمعه واول ما يبدا يخلص اجري علي المطبخ اقول لماما لان كده معاناه ان المغرب قربت ومفيش وقت ونسمه احلي صوت في الاذان صوت الشيخ محمد رفعت

وسعات لما كان بابا يجي تعبان مثلا او حاجه ويروح ينام شويه ينادي عليا ويقولي تعالي نامي جمبي يا بت ياسمكمك اجي انا بقي بكل ادب واروح عشان مكسفوش والاقيه ياخدني في حضنه بس يكتم نفسي ابقي مخنوقه مهو بالنسبالي بقي ضخم ووشي في صدره ومش عارفه اتنفس ايه الراجل ده!!!!

وانا من زوقي وادبي مرداش اقزقه ولا ابعد ايده عشان يعني مزعجوش ولا اصحيه وابقي خلاص هموت كان نفسي اخد نفس واحد بس وهوب اغطس تاني يا جماعه بس علي اخر وقت ربنا بيتسرها وسمكه بتعيش

مش زي العيال الصغيره دلوقت تلاقي العيل من دول بجح ورزل لسه هتبوسه ولا تشيله بكل سفاقه وتبجح يزقك ولا يلطشك بالالم ولا يقولك اوعي بكل رخامه ويرفصك

ولو روحنا عند تيته بيبقي رمضان متعه ما بعدها متعه بنشجع بعض علي اذي الناس انا واخواتي واطفال العيله كلها كنا كتير اوي ماشاء الله بس كنا عفريت اول ما بنوصل الجيران كلها بتزهق اه والله كل الناس بتحطاط منناعارفين ان هتبقي في مصايب وبلاوي هتحصل لان كنت ديما بفكر ازاي أأزي الناس عشان نضحك ونستمتع كان شغل عيال بقي محدش يشتم شيفاك ياللي هناك اهو

وانا كنت العقل المدبر وعشان ابقي صريحه مش لوحدي

نجري قبل المغرب نخبط علي بيوت الناس او نحدف بالطوب ونجري نسمع الاذان ولو في السحور كنا نمشي في الشارع نخبط ونجري نعمل حجات عجيبه كنا الاطفال الوحيده اللي تلاقيها في كل مكان واي مكان ونسهر للفجر و ياويله ياسواد ليله اللي ضيقنا في اي وقت في النهار يستني علينا لما الليل يليل بس ونبدا نشطنا ونظبطه

واقعد جمب تيته وهي بتفصص البلح واقعد احكلها علي اللي عملناه بليل بقي امبارح وجدتي كانت تضحك اصلها وهي طفله كانت اسود مننا وشقيه اه مهي كانت وراثه بعيد عنكوا

رمضان بالنسبالي زمان مجرد فرحه اطفال واكل ولعب وفوازير وكان ليه طعم وريحه وشكل تاني حبك انت يارامضان شكل تاااااااااااني

لما كبرت طبعا رمضان اختلف بس بأمانه والله رغم حجات كتير زمان حلوه وذكري جميله بس كل ما الواحد كبر بدا يحس بيه ويفهمه صح لما كبرت وبدات بقي افهم ازاي الواحد يعرف يستمتع برمضان صح والترويح والسحور والعشره الاواخر بجد من اجمل ايام حياتي وخاصا الصحبه الصالحه اللي كلها سفرت دبي والكويت(وش حزين) دلوقتي وكلهم مشوا وصفصفت عليا انا واختي وشويه بنات قليله كانت احلي صحبه من اجمل ايام حياتنا كنا بنستناه من السنه للسنه

كنا نساعد ماما ونحضر الفطار ونبقي بناكل بسرعه عشان نلحق احنا وجرتنا نركب عربيتها ونروح نصلي عشان تلحق تركن في اي مكان لان الناس بتبقي كتير من اول يوم ونصلي الترويح ونستمتع اوي بصوت الشيخ ربنا يبارك فيه صوته كان تحفه وبيخلي الواحد يركز في القرأن وميسرحش وكنا بنقف وقت طويل بس من حلاوه صوته مش بنحس وكانت الناس جميله بجد ونخلص تراويح وفي وسط الترويح المايه الساقعه اللي بمورد الله ياسلام ونجيب معانا احنا كمان ونصلي الفجر مع بعض وكل يوم علي كده وكانت بتحصل موقف عمري ما هنساها في حياتي تموت من الضحك وانا برغي كتير ومش هحكي عشان شكل البوست ده هيوسع مني انا عارفه نفسي برغي برغي اهصحيح ابقوا ادعولي ابطل رغي يا جماعه ماشي؟ ما علينا نكمل رغي

ويجي بقي العشره الاخري ليهم جو تاني

وكنا نتلم احنا واصحبنا نروح مسجد القائد ابراهيم وكل مجموعه متكربسه في عربيه فوق بعضها يجي تلت عربيات او اربعه من اصحابنا كان بيبقي تحفه الشوارع كلها مقفله من عند المجمع الكليات لحد ما يوصل لمحطه الرمل من البحر بتبقي محطات كتيروكل ملينا ستات كتير والجو تحفه واللي يروح يشتري سحور واللي يصلي واللي يقري قرأن وكنا نتعرف علي ناس كتير جو هادي ومفيش صوت والله انا بكتب وانا متخيلاه احساس فظيع وحاله تانيه صفاء وهدوء وسكينه

ووقت السحور بقي نتلم كنا ولاحوالي 12 او 15 ونقعد نشد من بعضالاكل ونهزر ونضحك ونخلص سحور ونصلي الفجر وفي صلاه التهجد وياجمال علي صلاه التهجد والدعاء وكله في صوت واحد بيقول امين والدنيا سكون متسمعش غير الدعاء وقول كلمه امين وصوت الهوي وهو بيطير الهدوم ونعيط ومتعرفش احنا بنعيط علي ايه وتحس بعد ما بتسلم ان هم اتشال من علي قلبك وانك عملت حاجه كبيره اوي وطبعا بقي اللي عامل بلاووي يعييييط واللي مزعل معرفش مين يعيييط واللي مهبب الدنيا يعيييط بهزر باين كلنا بنشجع بعض نعيط واللي ملهوش نفس يدعي ويعيط علشان يعييييط وبعد ما نسلم المنديل تشتغل وديما كل واحد مستعد ومعاه مناديل كتير احطه في كم العبايه عشان يبقي قريب مني هههههههه اشمعني هما بيعيطوا بقي هو انا مليش نفس وبعدها نخلص ونضحك بقي لا انا بهزر والله طبعا متعه ما بعدها متعه اللهم رقق قلوبنا واعوذ بك من عين لا تدمع وقلب لا يخشع وبعد كده ونركب العربيات ونطلع علي البحر اللي معاه اذكار واللي معاه قرأن واللي يستغفر وكل مع نفسه ونفضل لحد الشروق وناس كتير ماشيه حوليك كتير اوي وتحس بأمان وكاننا الضهر والله اكتر وقت بحس ان مصر امان فيه هو رمضان ,ليله 29 وليله 27 بتبقي رهيبه كانها في مكه ونفضل بقي نبص للشمس شكلها ايه انهارده وكله يبص في السما لحد الشروق ونرجع علي البيت مش شيفين ادمنا بقي نطب علي السرير ننام ونواصل المسيره بيبقي عشر ايام موت بس بنحس باستمتاع رغم التعب

كان رمضان اللي فات مش مبسوطين اوي عشان كتير من صحبنا سافروا في نفس الوقت

بس انا مبسوطه الحمد الله رب العالمين رمضان ده الانتيخ بتعتنا انا واختي نزلت وهتقضي شهر رمضان معانا وبنات نازله مخصوص بقت اجزتها في رمضان عشان نرجع زي زمان

لان السنه اللي فاتت كله كان بيرن علينا من بلاد كتير في وقت ما كنا بنصلي ونتسحر وكله مضايق ويفتكر ايام ما كنا مع بعض ومحدش فيهم حس برمضان لا في الكويت ولا دبي ولا اي بلد تانيه فالحمد الله رب العالمين كتير منهم ضروفه سمحت و قرر يقضي معانا السنه دي وهنرجع لايام العربده من جديد ادعولنا بقي ان ربنا يبلغنا رمضان ويكون افضل من اللي قبله

وكله يدعي لاخوه بظهر الغيب

وكل اللي نفسه في حاجه ينولها ان شاء الله

رمضان بيبقي فرصه لينا والله فرصه عظيمه

واخدين بالكوا مش هوصيكوا بقي

وياعالم الواحد مش عارف رمضان الجي هيعدي علياولا لاء

ولا سعتها هيكون فين؟ الله علم

يارب اكون في الحرم ياااااااااااارب

قولوا امين

(وش شرير)

اللهم بلغنا رمضان اعوام واعوام

وربنا يهدينا ويهدي شباب وبنات المسلمين ويصلح حال المسلمين

ويحقق لكل انسان ما يتمناه في الخير

اللهم امين

نفسي مصر ترجع امان زي زمان نفسي احس بالامان في بلدي

ادعولي بقي يا جماعه مش هوصيكوا في الايام المفترجه دي

وانتوا ساجدين مش اللي يجي يقول كلمتين لالا مينفعنيش انا الكلام ده

كل واحد وكل واحده تدعي بزمه منك لها لها انا قلت اهو

كل سنه وانتوا طبيبن

هقوم انام ينهار ابيض اوعوا بقي يا جماعه كده اوعو وسعوا الله!

انتوا رغيين كده ليه ياساتر عليكوا تمومتوا في الرغي

ياربي مش ممكن!!!!

لحسن هتسحل بكره الصبح

اشوفكوا علي خير ان شاء الله

(تحديث)

ابعدوا ياجماعه عن الخيبه الرمضانيه

الله يخليكوا ولا حد يصيف ولا يتفسح والعبط ده

والرقاصه زيزي اللولبيه وعبط المثلثلات الهنديه

رمضان فرصه ذهبيه

ده هو يدوبك شهر واحد يعني

اه والله زي ما شوفت في مدونه بنوته جميله علقت عندي اسمها( دموع القمر) ربنا يبارك فيها ويجزيها خير تصوير رمضان علي انه( مصباح علاء الدين) تطلب ما تشاء تصورها ليه تحفه ومظبوط جدا فعلا دي فرصه نحاول علي اد ما نقدر نبعد عن اي حاجه تلهينا ونطلب اللي نتمناه هيتحقق ان شاء الله واحنا بيقين وثقه في الله تعالي

منضيعش ولا لحظه ان شالله الوقت اللي منقدرش نعمل فيه حاجه او بنشتغل ديما استغفار وذكر

http://demo3-alkamar.blogspot.com/2009/08/blog-post_6587.html#comments

قال رسولنا الكريم

خاب وخسر من ادرك رمضان ولم يغفر له

اللهم بلغنا رمضان

واعتق رقابنا من النار

كوني له نعمه الزوجه

وصايا مهمة لكل زوجة لتبث السعادة في حياة زوجها ورفيق دربها ومن ثم ينعكس ذلك

على نفسها واسرته

وأهم مافي الامر احتساب الاجر عند الله

(طبعا للي متجوزين واللي مقبلين واكمان للي بيفكرو

ياله خالي الناس تعيش)

أولاً

أظهري له حبك وأكديه .. مثال ذلك : الإتصال به إذا تأخر عن العودة إلى المنزل حتى لو كنتِ غضبانة عليه

..(مش علي طول يعني عشان ميتغرش متعبرهوش اوي يعني بصي سيبك منه ولا كانه علي البال)

ثانياً

تجهيز الطعام الذي يحبه في وقته دون أن يطلبه منك ..

(لا يابنتي انتي هتتعبي نفسك وتوعجي دماغك وتقومي بقي واكل وغم ان شالله ما اكل يا كل اللي موجود)

ثالث

اًضمه وتقبيله عند دخوله وخروجه من المنزل .

.

(اه بقي مهو احنا فاضيين خروج ودخول لا كمان الحر والزهق بلاش ارف بقي ياشيخه كمان عشان العدوي كمان لازم تبقي مؤدبه وخجوله ولا يلمس شعره منك فاهمه يابت ايه قله الحيا دي!!!!)

رابعاً

استقبليه وأنتِ بكامل زينك ومتعطرة ومبتسمة..

واهتمي ببشرتك وجمالك واستعيني بكل ما هو جديد من كتب ووصايا للحفاظ علي اشراقتك

(مش لما يتعطر الموكوس الاول بلا هم بت انتي كده فله تطلعي من المطبخ جري عليه وبوظي هدومه وقولي يوه يقطعني

مخدتش بالي وتعالي بايدك اللي مليانه بصل وطماطم نفضي مرتين علي القميص بتاعه وياسلامه بقي لو كان ابيض واو)

خامساً

أحسني الظن به دائماً , وثقي به ..

(اوعي يا خيبه انا بقلك اهو ارجاله زي الغربال ويامأمنه للمايه في الغربال والكلام الفاضي ده متثقيش فيه نوهائي بصي

خلي عشته هباب خليه يمشي يكلم نفسه )

سادساً

لا تذكري أهله إلا بخير ولا تنسي أن تهدي لأمه بين فترةوأخرى ..

(والله حسب بقي يا اوختشي امه مضيقاكي ومطلعه عينك طلعي عين اللي جبوه اه واشتمي في اهله ليل نهار وحسبني كمان)

سابعا

إجعلي بيتك جنة يسعد في الجلوس به من حيث الترتيب وحسن التنظيم والتجديدوالتغيير الغير متكلف به واثيري الروائح

العطرية في المنزل المحببة إليه .

.(اه دي انا معاكي فيها بس بردو مش عشانه لا عشانك انتي يا بت خلي المكان اللي قاعد هو فيه مش كويس وميعرفش

يقعد شويه علي بعض مستريح لكن كل البيت فله خليكي شطوره ونضيفه اه عشان ميقولوش معرفش ايه)

ثامناً

اشغلي مكيف غرفة النوم على البارد في فصل الصيف خاصة عند عودته من عمله ظهراً,أودافئاً في فصل الشتاء ..

(لا خالص لعكس لو في الصيف غليه دافئا لو في الشتا خليه متلج بصي انا عاوازكي تسرعيه ميعرفش ايده من رجله )

تاسعاً

اهتمي بضيوفه وبالغي في ذلك ..

(اه بصبصلهم من وراه ظبطي يعني

استغفر الله العظيم سمحوه ده غشيم وميعرفش حاجه سمحوه

عاشراً

ابتسمي في وجهه كلما التقت أعينكما ..

(اه اعملي نفسك مكسوفه وخاصا لو امه معاكوا ومن وراها اغمزي واروشيه وشوريله وطلعي لسانك عبيطه دي ولا ايه! )

الحادي عشر

اسمعيه كلاماتك الحلوة ودعواتك الصالحة له ..

(ادعي عليه علي اد ما تقدري شوفي خليه يتكسح جمبك لا يعرف يروح ولا يجي قادر ياكريم)

الثاني عشر

اهتمي بنظافة أبنائه واجعليهم كالوردة الفواح عطرها..

(لا سلطيهم عليه وهو نايم يخضوه ويقرفوه ويلعبوا ويتطنطوا حوليه ميعرفش يدوق طعم النوم بصي كمان خالي الواد تامر يبقي مبلول وحطيه عليه وهو نايم وخالي البت نهي تلعب بالعروسه بتعتها وتهبده في دماغه وخالي يوسف يلعب في عينه البخت من الاخر خليه يشد

شعره ويدعي علي اليوم الي فكر انه يتجوز ويكون اسره)

الثالث عشر

قومي على رعايته واهتمي به أكثر عند مرضه .

(لا خالص زليه ونشفي ريقه علي كوبايه مايه ولما يكح ولا يبقي تعبان اضحكي عليه وخلي العيال يشاوروا عليه

ويضحكوا ويحدفوه باللي في اهدم مهو تعبان ومش هيقدر يحامي عن نفسه استغلي انتي الفرصه ومصمصي شفيفك

وعيريه بمرضه واول ما يخف ويشد حيله ده ان عاش يعني اجري انتي والعيال علي بيت ابوكي بسرعه ده لو حد رضي

يفتحلكوا الباب انتي وعياله اللي مش متربيه دي )

الربع عشر

إحذري أن يرتفع صوتك على صوته حتى لو كنت مازحة ..

(لا بقي برحتك بس بزوق محدش يسمعك عشان محدش يغلطك لكن لو لوحدكم طلعي عينه زعقي في وادنه لكن ادام

الناس خليكي لئيمه والعيبه متطلعش منك وانتي ضعيفه وبنت ناس ومحترمه)

الخامس عشر

لا تنشغلي عنه أثناء وجوده بالمكالمة والقراءة وتنظيف المنزل..

(لا يابت هو انتي فاضيه لدلع ده برحتك برحتك شوفي اللي وراكي بلا هم بلاش كلام فارغ)

السادس عشر

إذا اصطحبك إلى السوق خذي رأيه في مشتراياتك واثني على ذوقه ..

(لا قوليله ايه الارف ده ايه البيئه ده روح ياشيخ انت بتفهم حاجه! ولوي بوزك وديما مش عجبك العجب)

السابع عشر

إذا كنت في منزل أهله أو أهلك ناديه يا أبافلان تقديراً له واحتراما ..

(اه ابو قردان ابو شلولح ابو .... كده نوع من الهزار الماسخ لا وكمان اعطسي في وشه ولا اتعمدي تكحي في وشه

وقوليله يوه معلش واضحكي ضحكه مستفزه وايدك تبقي زي الفاس واضربيه علي كتفه اوي كاني بتهزري معاه وبعد

كل ده احدفيله بوسه علي الهوي مش هيقدر يقولك تلت التلاته كام بصي خليكي غبيه غبيه وتقيله من الاخر متنطقيش

يعني )

الثامن عشر

إذا أراد السفر اكتبي له رسالة تعبرين عن اشتياقك له وعطري ملابس نومهبعطرك حتى يتذكرك أثناء سفره ..

(لالالا لو عطر أي كلام واشتري عطر عفش ايون عفش ورحته متنطاقش ورقي هدومه كلها لو غالي وكويس انصحك

خساره دلعي نفسك بيه اتني خساره ال هدومه ال لا طبعا تبقي عبيطه(وش مطلع لسانه للرجاله )

التاسع عشر

إذا غضبت منه واعتذر إليك إقبلي إعتذاره على الفور ,

(لا اتقمصي وازعلي واغضبي ولو يعني روحي عند اهلك وادعي عليه اقلك ارفعي دعوه في المحكمه)

وإذالم يعتذر بادري أنتي بالإعتذار .

.اوعي خالص لزمن ولابد يعتذر هو وكمان اطلبي هديه غاليه خالص خالص )

العشرون

إذا كنت في أي مكان به رجال سواء في السوق أو المستشفى وغيرها من الأماكن التي بها رجال

حاولي أن تخفضي رأسك وتغضي بصرك , ثم قولي له أنت مالي عيوني بجمالك وحسنخلقك فلماذا أنظر لغيرك .

.

(بصي من تحت لتحت استهبلي يعني ولو يعني حاولي وهو مش معاكي مع صحباتك بقي برحتك افتحي علي الربع

عيشي عيشي يا شيخه

الدنيا مش مستهله منتي فضلتي عند اهلك محترمه نفسك وكويسه لحد ما اتجوزتي خلاص بقي محدش هيتكلم عليكي منتي

اتجوزتي عيشي بقي هههههههه)

اخيرا والاهم

(دي بقي من سموكه وحياتكو انتو)

اكثري من قرأه القرأن الكريم في بيتك وغرفه نومك وقرأه سوره البقره كل يوم (ان امكن) وقرأه سوره الكهف كل يوم جمعه

والاستغفار والتسبيح في كل وقت حتي في اوقات صنع الطعام وترتيب المنزل

(بدل النم يعني والرغي في الكلام الفاضي اللي ملوش لزمه ولا بيودي ولا بيجيب)

اجعلي لسانك رطب بذكر الله تعالي

حافظي علي

صلاه قيام ا لليل واجعليه يشاركك في الصلاه والدعاء

وحافظي علي صلاه الفجر

استعيني بالكتب الدينيه والثقافيه لتوسيع مداركك

اطلبي منه بأسلوب ودود بأن يحافظ علي صلاه الجماعه لعلها تذيد البركه في البيت وتبارك في اطفالكم وتوسع رزقكم

واعينيه علي صله الرحم

بالتأكيد الأمر لا يقتصر على ما ذكر هنا

,[ أنتِ ريحانة الدار يا حواء فلا تنسي ذلك أ جر عند الله

ولكل انثي طريقتها الخاصه في الحفاظ علي بيتها وملئه بهجه ونور

حيث هي مفتاح السعاده

اعدولي بقي يا جماعه ها اظن مفيش احسن من كده

(كله منقول الا اللي بين الاقواس اكيد طبعا مش عاوزه مفهوميه)

دي واصايا قبل رمضان عشان الستات تشد حلها كده وتبقي بيوتنا الاسريه هاديه وجميله وكلها محبه وسبكوا من اللي

البت سمكه بتقوله ده يخرب البيوت دي بت منها لله

محدش ياخد بنصحتها ابدااا

خليكوا في النصايح دي جميله عجبتني قلت انقلها لكوا بمناسبه شهر رمضان والشياطين هتتسلسل اهو محدش

ليه عذر

عشان ربنا يبارك في حياتها

كل سنه وانتم بخير

أهم حاجـة النيـة السليمـة

l (معلش يا جماعه البوست طلع طويل اوي يخربيت الرغي اللي مشغول منصحوش يقري الهبل ده لان عاوزه انام ومش هعرف اظبط حاجه واخر مره اطول كده اهو حاجه مكتوبه ليا للذكري لما نزلته اكشتفت انه طويل محدش يشتم ولا يكلم عليا بنيه وحشه حكم انا عارفاكو)
اذيك يا سموكه صباح الخير

صباح النور ياجماعه ها مذكرين ووش مبتسم ومشرق اشراقه ما بعدها اشراقه
انتي مذاكره؟
وانا ببتسم لا ليه؟
يالئيمه
ديما بتنجي تضحكي ومبسوطه والدنيا حلوه معاكي واحنا متوترين ديما وانت عندك لا مبالاه
وتنجحي وبتقدير كمان !
ياجماعه اهم حاجه النيه وسيبكوا انتوا وجوه يبقي نضيف وابيض(وش بيغمز)
طب ليه ديما جايه زي المتخلفين فتحه درعاتك للناس كلها وبتضحكي ديما ووشك مبتسم
انا: ياساتر طب ولازم اقلق واتغم واخاف والهبل ده ايه اللي هيحصل يعني متولع اي حاجه في الدنيا
سمكه مضيقش نفسها عشان شويه كلام فارغ ال امتحانات ال (مش كده ونبي يا جماعه)
نيجي بقي لامتحانات الشفوي كانت فظيعه انا فيا طبع غبي جدا ممكن في حاجه مهمه او اجتماع او مقابله او اي حاجه رسميه ينزل عليا بضحك وضحك غبي ومعرفش ليه وبتحرج جدا وبيحصل موقف مهببه بسبب الموضوع ده
امتحانات الشفوي كان في منها مثلا مره دكتورواول ما قعدنا ادامه وانا جايه هقول ايه بالبركه ياله لقيت هيقعد جمبي بنتين وولدين وشكلهم يموت من الضحك ده في سنه اولي مرعوبين وخايفين وشكلهم متوتر ليه يعني وعشان ايه وايه يعني دكتورمحبش كده المهم منظر العيال ده موتني من الضحك وبقيت اكلم نفسي يارب ابطل يارب مضحكش يارب اقف جمبي بقي مش عاوزه اتهزق ولكن, لاسف ضحكت
وبخبي وشي واحاول افتكر حاجه مأسويه في حياتي تخليني اعيط طب اكشر طب ابوز طب اسكت ابدااااااااااا
قلت خلاص بقي لقيت الدكتور بيبصلي وعنيه بتق شرار ومتغاظ ازاي ده لازم نبقي مرعوبين سنه اولي بقي وبيستهبلوا علينا وقاعدين ادام دكتور بحق وحقيقي ال يعني
فقالي انتي
اقري القطعه دي المهم لسه بقري وبستهبل بقي باكل الكلام وبسرعه
قالي لا ياحلوه براحه كده وواحده واحده المهم
براحه براحه هو احنا ورانا حاجه هو الراجل هياخد الزنزانه ويمشي وبقري براحه قالي بس اقفي عندك
شكلي( القصيده الشعريه) ان ان
انا بقي بصيت كده من تحت لتحت وقلت
القصيدتوا الشعري وسكت
وابص براحه كده بأستعطاف الشعري تن .... تون... تي وحركات بقي وشفيفي اضمها واكسرها وملامحي تتغير واميل براسي ال بسأله يعني
تن ولا تون فقالي لا
شعريه بالرز انتي بقي بتعمليها بأيه

قمت فاتحه في الضحك بصوت عالي وشويه وهقوله كفك يا جدع منت حلو اهو
انبي محد واخد منها حاجه
راح مكشر واتغاظ اكتر اني ضحكت واللي يغيظ ان العيال اللي جمبي محدش ضحك مرعوبين وهو مبسوط اوي بلاحساس ده انهم خايفين منه دي كانت مره

السنه اللي بعدها جه نفس الدكتور ولسه بيقولي
تعرفي تقوليلي؟ ولسه هيسأل
روحت جوبت وقلت لاء
اه والله معرفش انا عملت كده ليه بس كنت زهقانه بصلي وسكت الحمد الله وراح مبصليش خالص وبقي يسال العيال وانا بعلب في صوابعي علي ما يخلصوا وقمت روحت بقي وانا قايمه بصلي بصه كده وانا رخمممممممممممممه ابتسمت له شوفوا البجاحه (بعاكسه)
ايام الكليه كان عندنا حفظ اشعار كتير وانا عمري ما حفظت قصيده واحده ولا كنت بحب الشعر ولا الحفظ انا مكنتش بحب في حياتي غير حاجتين او تلاته لقمه القاضي والحصان والورد
جه الدور عليا وانا ببص للي قبلي والاقي اللي حافظ 14 قصيده واللي 13 واقل حاجه 10 واحنا عندنا كتير جدا
يالهوي طب هعمل ايه هقعد قدام الراجل اغنيله ولا اهزر معاه ولا اضحكه شويه ولا انيل ايه في اليوم الهباب ده
ده دكتور غتت وكله بيخاف منه وكشري والليله هتبقي زي وشي طب جيت ليه طب ولا بيت انا حافظاها يخربيتي طب اروح لمين واوقول يا مين ينجدني منه
المهم روحت كده وقربت منه وشوفت هو بيسأل ازاي
الاقي يسال كل واحد او واحده حافظه كام قصيده ومعرفش ايه وفي قصيده معينه يسال اي حد تلاقي اللي يقول حافظ كذا وكذا و لسه هيكمل يقوله طب حافظ قصيده كذا هي قصيده رخمه وملعبكه وصعبه وكانت بتغنيها فيروز بس مش فاكراها
يقوله لا كذا حد بالمنظر ده انا حسيت ان الدكتور مهتم اوي بالقصيده دي العيال تقوله 20 قصيده وتسمع ويجي يسال علي دي بذات محدش في الدفعه بحالها حافظها بس حافظين غيرها كتير فزهق
انا بقي مسكت الكتاب وقعدت اقري وادور وكل ما احاول احفظ حاجه من اي قصيده ازهق تؤ رخمه
تؤ وحشه تؤ دمها تقيل واقلب في الصفح وبصيت علي القصيده كده وعماله احفظ فيها
لحد الدور ما جه عليا قالي
ها حافظه ايه؟
قلتله: حافظه قصيده كذا اللي هيا القصيده الي محدش حافظها والصعبه دي
فلقيت وشه ابتسم وبقي مبسوط واتعدل في القاعده وقالي ها قولي اخير لقيت حد في الدفعه حافظ القصيده دي وكان منبهر بيا
المهم بدات وبقول أول بيتين منها اللي لحقت احفظه
قالي ها كملي
قلتله بس حضرتك
قالي مش حافظه غير بينين فيها
قلتله اه حضرتك
قالي مش مهم احسن من مفيش اهو محدش خالص فكر يحفظ ولا بيت انا مبسوط منك
قالي ها
حافظه ايه تاني
قلتله لا مهو خلاص حضرتك كده بس
قالي نعم!!!!
مش حافظه حاجه تانيه من اي قصيده غير البيتين دول
قلتله اه وانا ببتسم الابتسامه البايخه بتعتي
انا لقيت الدكتور فتح في الضحك جدااااااا وصوته عالي حتي كل المدرج هوس وسكت بشوف الدكتور الغتت ده بيضحك علي ايه غريبه مين ده اللي قدر يضحكه!!!
وقالي علي النعمه انتي بت زي العسل وانا بضحك معاه بقي بقينا صحاب
بجد انا مش عارف اقول ايه بس عجبتيني انتي منين؟
قلتله حضرتك انا من اسكندريه
اممممممم اسكندريه طب واشمعني البيتين دول يعني الللي حافظاهم
قلتله والله انا جيت لقيت حضرتك بتسال علي القصيده دي مخصوص
قلت حضرتك بتحبها يبقي لازم يعني احفظ حاجه منها وكده يعني
قالي طب والقصايد التانيه؟
حسيت ان حضرتك مش بتحبها
ضحك تاني قالي لا ياشيخه طب والله هتاخدي الدرجه النهائيه في الشفوي ياله ان شالله ما حد حوش
قلتله شكرا وقمت منشكحه ومكنتش متوقعه رد فعله انا قلت اليليه هتبقي زي وشي

وكل العيال مسبهله وكله بقي يتكلم وانا منشكحه وعملتلهم باي باي بقي
ووطيت علي واحده صحبتي وقلتلها في ودنها عشان اقلك
خالي جوه سالك وابيض اهم حاجه النيه
سلام
هيييييييييييه اياااااااااام

أخيرا

انا مبسوووووووووووووووووووووووطه جداااااااااااااااااااااا اوييييييييييييييي خااااااااااااااااااالص خااااااااااااااااالص

الحمد الله رب العالمين كده تمام اوي مش عارفه اقول ايه خير اني مبسووووووووووووووووووووطه

نجحت وهتطلع ظاااااااااااااابط اد الدنيا متشكره بقي يا جماعه علي كل اللي دعي بزمه انا جيت اطمنكوا ان البت طلعت زي العسل وربنا كرمها كنت قلقانه ومنمتش وعلي فكره انا اللي جبتهالها وبشرتها واول مره يطلع وشي حلو علي حد (يا حلوتك يا سمكمك) اساسا اول مره اجبها لحد ال وشي وحش ال وقلت لازم اعمل بوست عشان انا ايه؟

مبسووووووووووووووووطه

اصلها غاليه عليا اوي خاصا كنت مطلعه عينها وهي صغننه بيبي كنت بعذبها بردو

في بوستات بقي جايه ابقي احكي علي اللي كنت بعمله فيها

شوفتوني وانا طايره فوق ازاي

بس الجو كان حر شويه بقي وساعه الفرح بقي وكده

محدش بياخد باله من ايوتهاحاجه

الحمد الله رب العالمين

رجعلكوا تاني

سلام

الحلو حلو

حيرنا جمال الملاح فلا نعود نعرف في اي ارض نحط او تحت اي سماء

قال الحكيم

المليحه من تزين حليها....لا من غدت بحليها تتزين

قالت جدتي بقي(القالب غالب)امال ايه

المرأه الجميله ليست طيبه دائما... ولكن ... المرأه الطيبه جميله دائما

المرأه الجميله تملك (القلوب).. والمرأه الفاضله تسرق العقول

المرأه الجميله هي التي تطرب لشروق الشمس وتنسي ان لها افولا

للجمال شروط كثيره اهمها الابتسامه

من اقوال المصرين

ملقوش في الورد عيب قالوا احمر الخدين

الحلو حلو ولو قام من النوم ... والوحش وحش لو استحمي كل يوم

بيع الجمال واشتري الخفه ..ده الجمال كتير لكن الخفه صدفه

من عرف ربه رأي كل شئ في الحياه جميلا

***********

******************

اي حد يجي هنا بالله عليكوا يدعي للثانويه العامه كلهم الله يكرمكوا

بنت خالتي اول امتحان بكره وبتعيط ومرعوبه وبتصل بيها كل شويه دي حد مهم بالنسبالي دعائكم بقي معانا عشان املنا فيها كبير

(نفسي اشوفها ظابط اد الدنيا)

يارب يا(....) يابنت امو ايه(.....)

اشوفك ظابط

ربنا يصلح احاولهم كلهم

ادعوا بقلب الله يخليكوا بجد دي قريبه سمكه

مش اي حد يعني

وقدموا السبت تلاقوا الحد

هووووووو نام

طبعا انا اتكلمت عن اني زمان كنت بصحي ازاي وتيته ربنا يبارك في عمرها كان لازم اقول كنت زمان بنام

ازاي والواحد في الوقت ده مفتقد النوم ده اوي يعني فالواحد بيحن لزمان وايام زمان بردو
المهم ماعلينا من الغتاته دي كلها واللي بيتغمز عليا واللي بيشتم في سره هندخل في الموضوع اهو حاااضر
زمان كانت تيته تاخدني تنيمني علي رجليها لما كنت اعيط لو عاوزه ماما ولا حاجه وتلفني وتفضل تطبطب

علي ظهري واسمع صوت اديها والصوت والزن اللي طالع من ظهري بسبب الطبطبه والخبط وانا بعيط زي العروسه اللعبه والحجاره بتعتها

كده بظبط وانا استمتع بالصوت اللي بيزيق ده واتمادي في العياط عشان اسمعه وتقول ايه بقي تقول

هووووووو نام وانا اجبلك جوز حمام انا سعتها بقي زي ما بقلوكوا كده هوب

يجي في خيالي صوره جوزين حمام مشوين كده من اللي قلبكوا يحبهم اصلي بحب الحمام وتفضل ترج فيا

زي ازازه البيبسي وانا سيبها لاني بتخيل وفرحتي متتوصفش بسبب اللي هتجبهولي ووشي يبتسم وبهجت كده

في وشي والفرحه تنط من عيني اللي بتلمع وترجع جدتي ربنا يسمحها بقي تقول متخفش ياحمام ده انا بقولها كده عشان

تنام ارجع حوجبيني تضم علي بعضها زي شكل تمانيه وشفيفي تنزل لتحت وعيني تغمض واكعمش في نفسي وازعل ايه الهزار

التقيل ده وكنت بقي اكلم نفسي كده اقول يعني تيته بتتفق مع الحمام عليا لا وايه بتقول ادامي عيني عينك كده

مفيش خشه ولا احترام اللي هتنام دي طب مش نايمه بقي ايه رأيكوا ؟بقي وسعات تصادف اسمع صوت الحمام

غوغو غو غو وكلام من الفارغ ده او اسمع صوت اليمام كنت بحبه جدا جدا صوت اليمام وخاصا في وقت ميكونش

في حد خالص والدنيا هوس هوس وصوت الهوي والنسمه الجميله بتاعه الصيف دي في شهر خمسه والجو كله رحته

زهر وجميل ولسعه الهوي في فتره الربيع والجو جميل وريحه الحلو ه

عمتا يعني بحس ان من ارقي الطيور الحمام واليمام بس الله يسمحني بقي كنت بعذبه والعصافير

بردو وبعد ما اعذبهم كنت بحفر وادفنهم وكنت الله يقرفني بقي بعذب الدبان بالكرباك اللي هو حزام البنطلون

يعني واعذبه اعذبه مفيش هزار
اصلي كان نفسي اطلع ظابط امن دوله وكده لا بس د ه انا كنت اعجبكوا اوي ظابط ظابط مفيش

كلام ليا طرقي الخاصه في التعذيب بس الوحيد اللي كنت بحبه النمل اظبطه واحطله سكر واربيه بس لما

كان يشيل حاجه علي دماغه انزلها والنمله تلف حولين نفسها قوم ايه انا افرح وتشيل تاني وانا انزلها من علي

دمغها وتدوخ هي بقي وانا استمتع بقي انها كل ما تشيل السكر ارخم واشيله لدرجه انها كانت بتزهق وتسلم امرها

لله وتمشي تصعب عليا احطها ادامها عشان تشلها ترجع تشلها انزلها تاني اه والله ربنا يسمحني بقي

علي عكس لما ببقي مع ماما كنت فاكره كنت بنام وسعات نشره الاخبار بتقول تلاقيني اعيط واعيط من الموسيقي

بتعتها انا لحد الان اموت واعرف بجد كنت بعيط ليه وبخاف من ايه و ايه في موسيقي نشره لاخبار الرخمه بتاع

زمان دي تخلي الواحد يعيط اما انا كنت عبيته صحيح بضحك لما بفتكر والله اما الواحد عليه حجات يا اخي هيييييه
وكنت زلامن ولا بد انام علي صوت الراديو وكنت فاكره برنامج كئيب بيجي يوم السبت اسمه الارشيف باين بليل الساعه

10 جرائم وهباب علي عنيهم اسمعه وانام علي الجريمه هو انا طلعت كده من شويه اسكتوا اسكتوا عمتا كنت بنام علي الراديو

واصحي علي الراديو في برنامج بصبح عليك البرنامج اللي كنت بروح ديما متأخره المدرسه ومكنتش بعرف اللبس الشراب

بكلون وماما تفضل تشد في شعرها الخطين وري والخط لوحده ادام وكان شراب لونه ابيض كده وانا هطله وساااااكته

وبردوا البسه غلط وتهبدني علي الكرسي تسرحلي شعري

كان مالي ومال الكلام ده كله
مالها تيته يعني والحمام والنمل والنسمه والهوي والحياه الرايقه دي ال مدرسه ال وشراب بكلون

ال عملي ايه الشراب دلوقت صحيح محدش عارف مصلحته اوعوا كده بلا هم