( اللي عايز يستمتع بقرأه القصه بجد ميقراش اللي بين الاقواس علشان يستمتع ويبعد عن رخمتي)ذات يوم خرجت امرأه من منزلها فرأت ثلاث شيوخ جالسين في فناء المنزل( اللي تبعها يعني )لهم لحي بيضاء طويله
(مهي لازم يكون ليهم لحي مش شيوخ بقي)المهم
قالت لهم لا اظن اني اعرفكم ولكن لا بد انكم جوعي (ده تلاقيهم قاطعين من الجوع) ارجوكم(وحياه ابوكم) اتفضلوا بالدخول لتأكلو(والله الوليه فيها الخير)
سألوها هل رب البيت موجود؟
(والله رجاله وبيفهموا متلقيش كده اليومين دول !)
فاجابت : لا انه بالخارج.
فردو: اذن لا يمكننا الدخول
(لا رجاله رجاله مش بقلوكوا)
وفي المساء وعندما عاد الزوج اخبرته بما حدث
قال لها:اذهبي اليهم واطلبي منهم الدخول!
(طب ده راجل راجل يعني طب ميروح هو ايه الغتاته دي يخلي حرمه بردو تنكشف علي رجاله وهو قاعد ادام التلفزيون يقزقز لب ياشيخ بلا هم اما نشوف اخر القصه)
فخرجت المرأه وطلبت اليهم ان يدخلوا.(اصيله خاله ستيته بطيع زوجها لا اصيله اصيله يعني مفيش كلام)
فردو نحن لا ندخل المنزل مجتمعين.(عشان الحسد وكده كمان عشان ميتقلوش علي الناس حاجه تقرف)
سألتهم: لماذا؟
فأوضح لها احدهما قائلا :هذا اسمه* الثروه* وهو يومئ كده علي احد اصدقائه (بينغزه كده يعني), وهذا* النجاح*
وهو يومئ نحو الاخر وانا *المحبه*
واكمل قائلا:والان ادخلي (يا حرمه) وتناقشي مع زوجك من منا تريد ان يدخل منزلكم؟
دخلت المرأه واخبرت زوجها بما حدث(لازم تحكي كل حاجه لزوجها طب مهو كله كده محدش بيخبي حاجه عن جوزو غير اللي عايز يخبيه بس بلا هم)
فغمرت السعاده زوجها (ابن المحظوظه) وقال: ياله من شئ حسن, وطالما كان الامر علي هذا النحو فلندعوا *الثروه *
دعيه يدخل ويملئ منزلنا بالثراء!( ورفع ايده كده للسما وبص لفوق وهو بيرد كلمه ثراء ثراء وبيهز في راسه يمين وشمال بسرعه بس مبتحصل لا الليمين ولا الشمال وشكله عبيط وهو مغمض عينه ويقول ثراء والكلمه تخبط في زوره اء اء اء)
فخالفته الزوجه قائله عزيزي لما لا ندعو النجاح (الستات مش سهله بردو ولا عبيطه عقلانيه ومش عا تشيفيه ثروه ايه يا اهبل يا ابو رياله مهي ممكن تخلص خلصت روحك)
كل ذلك علي مسمع من زوجه ابنهم( ده ناس كبار بقي مش صغيرين وزوجه ابنهم في نفس البيت والله حاجه جميله ولا يمكن جايه زياره : القصد ) وهي في احد زوايا المنزل فأسرعت بأقتراحها قائله.
اليس من الاجدر ان ندعوا *المحبه* ؟
فمنزلنا حينها سيمتلئ بالحب( ودي بقي حاجه غريبه ومش مظبطه في القصه حبتين لان كان من الافضل ان الحكمه تيجي من الاكبر سنا يعني رجل حكيم او شيخ كبير او امرأه عجوز ده اللي اتعودنا عليه بس اهو يمكن نوع من التغير! او عشان يصلحوا الفكره الهباب اللي متخده عن زوجه الابن بلا نيله)
فقال الزوج دعينا نأخد بنصيحه زوجه ابننا( البت هنيه طول عمري بقول عليها عاقله وهتعمر مع الواد مسعد وهي اللي معقلاها جتو نيله عليها بدري )
اخرجي ودعي *المحبه* ليحل ضيفا علينا(ال يعني هو هلال العيد ولا شهر الصوم بس بردو مفيش احسن من المحبه هلومي يا وليه)
خرجت الزوجه وسألت الشيوخ التلاته : ايكم* المحبه*؟ ( ال يعني هي معرفتش مين المحبه اللي كان بينغز اللي جمبه ويعرفها بيهم هتستهبل اهه وتعمل مش واخده بالها زي الافلام العربي ما علينا)
ارجو ان يتفضل بالدخول ليكون ضيفنا.
نهض *المحبه*( ونفض قشر اللب اللي في حجره مهو كانوا بيتسلوا بقي مش من الصبح لحد المخفي جوزها ما جه وتلاقيه اكل وشرب الشااااااي واتفرج علي التلفزيون وهي بقي بدردش معاه لما معدته اتملت واستريح مهو متعرفش تفتح معاه موضوع غير لما يشحن الموبايل اقصد بطنه وتقوله بقولك ايه ياسي محروس في موضوع كده يا خويا هشورك فيه هه محروس بصلي متتفرجش علي التلفزيون محروس يوه يا راجل هو الواحد ميعرفش يتفك معاك بكلمتين كده انت نمت نامت عليك حطيه فز قوم كلمني, وله)
وبدأ بالمشي نحو المنزل( حساه كده بيسحف وبيشحطط بشبشبه اللي ربطه بحته قماشه عشان داب ورجليه متربه وحالته بالبله وحساه رحته وحشه ومكتومه كده)
فنهض الاثنان الاخران وتبعاه( ايه الغتاته دي وطبعا مش هشرح اكيد هما كمان نفس الوصف سواد بقي ثلاثه تخيلوا انتوا بقي المنظر والشحططه والضوافر طويله ومتنيله وهدومهم مهببه بقالهم شهرين مستحموش بلا غم)
سألت المرأه وهي مندهشه كلا من* الثروه* والنجاح* قائله: لقد دعوت المحبه فقط, فلماذا تدخلان معه؟
يختي شوف الوليه مش كانت الصبح هدخلهم كلهم !ولا عشان سبع البرمبه اللي بيمبربله المثل هو اللي قال شوف الوليه وكلامها اللهي تتوكسي يا بعيده)
فرد الشيخان( بيداروا كسفهم بقي واحراجهم واخدين بالكوا انتوا) لو كنت دعوت *الثروه *او النجاح* لظل الاثنان الباقيان خارجا, ولكن كونك دعوت المحبه فأينما يذهب نذهب معه.(شوف يا خويا الغتاته والبجاحه لا ياراجل!)
اينما توجد المحبه, يوجد الثراء والنجاح.
ودي حقيقه بغض النطر عن هبلي
اهم حاجه الحب حب الناس وحب غيرنا مش حب نفسنا وده اللي هيخلق كل حاجه كويسه
ويخلي الدنيا جميله وتتعاش وتعادي
ويجي بيه كل حاجه كويسه
الحب طفل صغير لا يعرف سوي كلمتين
عاوز كمان!
اذا ازداد حبنا .تضاعف خوفنا في الاساءه الي من نحب!
يعني نخاف علي زعله كتير
اللهم حبب الينا الايمان والمؤمنين .. واجعل في قلوبنا من الحب فيك لاخواننا المسلمين
اللهم اجعلنا من المتحبين فيك
اللهم امين
قولوا امين
حته كده علي جمب
معلش بقي يا جماعه انا علقت كتير برخمتي علي البوست( لسببين)
الاول اختي كل ما اعمل بوست واعلق بين قوسين تقولي متبقيش رخمه وبتبوظي القصه برخمتك وكلامك ودمك التقيل
فأنا من هنا طبعا عندتها و بالعند فيكي يا اختي هعلق برحتي وارخم وانتي مالك دي مدونتي رخمه حلوه ببوظ القصه ملكيش دعوه كل واحد واسلوبه بقي اهو انا كده وبئي وهرخم اكتر كمان ومسحت كتير بوستات قبل كده بسببها
وقلت انا بعمل المدونه دي لياوبسجل فيها اي حاجه حلوه وحشه بطبعتي وخلاص
(السبب التاني) اني مضايقه جدا وزهقانه حبتين ومتعصبه شويتين وخنوقه حبه يعني حجات كتير علي بعض ومن غير سبب فاكيد لما ببقي مضايقه اسلوبي هيبقي رخم واكيد بوظت القصه اللي المفروض تبقي رومانسيه بس الدنيا بقي كل واحد بيشوفها حسب موده هو انا مش من النوع اللي بحب الكئابه او اني ارخم اوي وبحاول اطلع من المود علي طول بس يعني بقالي كام يوم وبحاول اطلع اني اطلع ابدا بس انا عادي بردو الحمد الله انا مبسوطه انا مبسوطه مفيش حاجه خااااااالص خاللللص الدنيا جميله وزي الفل اهو
ومحدش يقولي القصه دي سمعتها قبل كده لاني عارفه طبعا اكيد سمعتوها بس خدوني علي قد عقلي وقولولي الله يا سمكه ايه الابداع ده يعني معلش استحملوا واسمعوها تاني مش هنخسر حاجه يعني اهو بندردش بدل حاله الملل دي
مدونتي بئي حد عنده مانع ؟ اه بحسب
دلوقتي وانا بكتب بنادوا عليا عشان اعمل شاي وانا بكره عمايل الشاي جدا ومخنوقه بس هعمل ايه هعمل شاي
وماما عايزاني اقعد جمبها نتكلم شويه وانا مليش نفس خالص وواحده صحبتي بترنلي وتسكت علشان ارنلها وانا مش بحب ارن لحد ايه الرخامه دي رنلي وارنلك مليش في الرنات وهي عارفه كده فبتالي مش هرن انا ناقصه واخويا بابا حلقله وبوظله شعره هههه احسن بيجرب فيه يعني حا جه ملهمش فيها بيعملوها ليه حاجه غريبه واخويا مضايق ومتعصب وبيقولي دورلي علي كاب بس احسن احسن اصلي متغاظه منه وكمان قمت من علي الجهاز عشان ابص عليه واضحك فعصبته اكتر واختي كانت نازله واتحيلت عليا انزل معاها وانا قلتلها لاء عشان متغاظه منها بردو احسن هسبها تمشي لوحدها
ولما اخويا هيقعد علي الجهاز طبعا كعادتي هفصل النت عليه بردو ومش ههنيه يقعد عليه وبابا بقي حبيبي بعمله الشاي وحش عشان ميطلبش مني اعمله تاني وبيشربه بالعافيه بس بردو مفيش فايده ان ما فطمتهم من الشاي ده مبقاش انا سمكه
الله يخربيت اللي اخترع الشاي ياريت يمنعوه من مصر
وفي الاخر حبوا بعضكوا واهلكوا واعملوا كل حاجه تفرحهم ومتعملوش حاجه تضايقهم وتعالوا علي نفسكوا في سبيل اسعاد وراحه الاخرين واستحملوا دول بردو اهلكوا وبيحبوكوا اما اقوم اعمل شاي ميتشربش لباباتي عشان اخويا حبيبي ابو راس مخبطه يقعد علي النت المفصول
ولا نفس ولا كلمه
مش ناقصه انا اصلي
رخمه مش رخمه عادي بئي كله محصل بعضه مبقتش تفرق
