الست دي كانت من اعظم الناس اللي قابلتها في حياتي طبعا مش اللي في الصوره هي احلي كان اسمها ملك وساكنه جديد في الشقه اللي تحتنا في يوم من الايام نزلت عند جرتنا اللي تحت وعندها بنوته ادي المهم لقيت بيحكوا ان الشقه اللي قصدهم سكنت جديد بس ست كبيره في السن وجايه من الصعيد ولوحدها وبتخاف جدا ومش بتأمن لحد ولا بتفتح الباب ولا بتروح ولا بتيجي وبنتها بتجي تشوفها كل فين وفين وكانت شكاكه جدا بس قوم انا ايه سبت اللعب مع البت وهرشت في دماغي وبدات افكر ازاي أأزي الست دي او ارخم عليها خصوصا لما عرفت انها بتخاف لان دي كانت هوايتي من زمان سعتها قلتلها طيب انا هقوم بقي يامشمشه اطلع عشان ماما متزعقش وابقي اطلعي انتي بقي تلعبي معايا المهم اول ما اطمنت انهم قفلوا الباب جريت روحت مخبطه بسرعه كتير وهوب جري علي فوق والست ياعني اترعبت مين مين ومحدش بيرد بس ومن هنا استلمتها خبط في الطالعه والنازله ولما كنت ابص من الشباك ولاقيها باصه وهي مكنتش بتشوف اوي عين ضعيفه شويه المهم انها كانت بتشوف ضعيف جدا فكنت اربط اي حاجه في حبل وانزلها وارخم عليها وواحده واحده بدأت تاخد علي جرتنا اللي ادامهاولما تبقي زهقانه تروح عندها شويه لكن مكنتش بتحب حد يدخل عندها ابدا فكنت بكلم معاها كتير ومره واحنا طلعين هي مروحه بتها وانا طالعه مكنتش بتشوف اوي فمش عارفه تفتح الباب بالمفتاح المهم بتقولي سمكه متعرفيش تفتحي الباب ياحببتي اصلي مش شايفه قلتلها حاضر ياطنط وهوب فتحت فبتقولي متيجي تقعدي معايا شويه قلتها اصل ماما طب مهو يعني يوه تيب وسبقتها علي جوه وانا مدخله راسي في قلب الشقه وانا بيني وبينكوا دنانه من يومي واحب ادفس هنا وهناك وكمان بحب الناس الكبار وقعدتهم ,قلت طيب شويه صغنتته استغربت لانها مبتحبش حد يدخل عندها نهائي ودخلت بقي عماله ابص حوليا وكنت مستغربه جدا علي جمال البيت ونضافته وهي ست لوحدها بس والله ما شوفت في نضفتها ولا اهتمامها ببتها ونفسها في السن ده زيها وقعدت استكشف البيت وشوفت السرير بتعها بتاع زمان النحاس ابو عمدان وستاير حرير ووقفت ادامه كتير ولفيت حوالليه كأنه مأم اصلي اعشق كل ما هو قديم واصيل وكل شويه استهبل والمسه واطلع اقعد شويه وانزل وكان جمبه صندوق من بتاع زمان كنت فاكره بقي مليان دهب ومرجان ووو ياعلي باباوهي كانت جوه بتجبلي بسكوتات وحلويات وجت جمبي وقعدت تحكي وتكلم عن زمان وايام ما كانت لسه صغيره وحكتلي عن قصه حياتها كلها بس علي فترات كنا عاملين زي حكايه شهرذاد نقف ونكمل اليوم اللي بعده فأتعودت عليا وانا كمان وكانت كل ما بنتها تجلها وتجبلها حاجه تستني متفتحاش غير لما اكون معاها وتاكلني معاها وبأديها وتبوس جبيني كانت بوستها حلوه اوي وتدعيلي , اول يوم حكتلي( بقلكوا ايه ركزاو معايا عشان هتناموا) اصل الحكاوي طويله وانا وحشني الرغي وهي بذات محتجالها الف بوست وبوست ,المهم حكتلي انها كانت عايشه في شبه قصر او دوار او من البيوت ااكبيره اللي بيبقي فيها خدم وحشم وكانت هي وكام بنت بس في البلد اللي بيروحوا المدرسه لان صعب هناك البنات تتعلم الا طبقه معينه في الصعيد كانت من ايام المالك فاروق وانا اول ما تبدا تحكي اسرح واتخيل كل حاجه بتحكيها وكانت بتتعلم الموسيقي وكان في المدرسه حافله المدرسه وحاضرها الملك فاروق وسلمت عليه المهم كانت دلوعه اوي لانها علي سبع ولاد وهي بنت واحده ورغم كل ده كانت بتدخل المطبخ بنفسها وتعرف تطبخ رغم انها مش محتاجه انها تدخل لان عندها ناس بيسعدوهم كتيرومربيه بس هي صممت لانها حابه كده
وحكتلي ازاي اتجوزت وكانت لبسه ايه والعرف كان ازاي وحجات كتير
بس جوزها بقي طلع ايه الله يرحمه بقي كنت بحس رغم العمر ده كله وانها ست كبيره في السن اوي لما تحكي عنه وشها يتغير كان مطلع عنيها ويبص لدي ويشوف دي ويتجوز دي ويطلق دي ناظر طايش طايش وهي صبرت عليه لان عندهم زمان لازم تستحمل بقي ابو العيال ومفيش حاجه اسمها طلاق ودول صعايده كانت حكيمه
ما علينا من ده انا اتعلمت منها حجات كتييييييير جدا جدا وقالتلي علي حجات اكتر فهمتها لما كبرت سعات كنت بستغرب كلامها او اهز راسي واكل الحلويات ومش فاهمه وهي ياعيني كنت انا التسليه الوحيده لها وبضيع الوقت الممل ومعايا كانت بتسترجع امجادها وانا باكل حلوياتها
طبعا مش هقولكوا قالتلي ايه ولا اتعلمت ايه لااااااااا هو انا عبيطه بجد يمكن حجات كتير بقيت مميزه فيها عن كل الي حواليا حاليا بسببها وقلدتها في حجات كتير محدش ياخد باله منها او تيجي علي بال حد ويمكن شخصيتي وطبعتي اللي شجعتني اني اكتسب منها كتيير
الي يعرفني عن قرب يعرف اللي بقوله او اقصد ايه
انا كده سبتني من الحاجه ملك وبحكي عن نفسي شكلي بدور علي عريس هه ومالو ياله
كانت بنتها متجوزه ظابط امن دوله وهي مكنتش بتحبه وانا لله في الله محبتش بنتها لما شوفتها مره مش عشان جوزها في امن الدوله حاشا وماشا ابدا الست دي كانت حابه تعيش معززه مكرمه في بتها ومتباقش عند حد لا بنتها ولا ولادها كل ولادها مسافرين بره وهي عاوزه متبقاش تقيله علي حد كانت بتريق كتير علي جوز بنتها وقالتلي علي بلاوي وكنا انا وهي نضحك وتتريق كانت ست عسل يمكن هي عرفتني ازاي اعرف اسمع اسرار واحافظ عليها كويس
الغريبه اني كنت صغيره بس قروبه طبعا كل ده ومتعرفش مين اللي كان بيرعبها او بيخبط عليها انا كنت برسم البراءه والوداعه واني هاديه لكن جوايه شطانه محدش ياخد باله اصلا ولا يصدق فكنت انا وهي متفقين علي خبطه معينه اخبطها وهي تفتحلي عشان مبتفتحش لاي حد تلات خبطات اه والله وكنت لما اتأخر عليها شويه ايه ياسمكه انتي فين انا مستنياكي شوفي عملتلك ايه وتعملي حجات واكلات صعيديه مش فاكره اساميها كانت بتحبني اوي وانا اتعلقت بيها اوي وعرفت حجات كتير في حياتها يمكن محدش يعرفها حتي من ولادها لان محدش كان فاضي اصلا يسمع وتقولي اقلك علي حاجه وانا وادني تطرطق لفوق وعيني تربق وافتح بوقي واشب علي رجلي اكتر اقولها ها وتقولي انا اول مره اقول الحكايه دي محدش يعرفها خالص ولا حتي ولادي وتحكي وانا افرح انها بتقولي انا بس ولما كنت اقرب منها ديما هدومها وريحتها جميييييييله ملاك كده حد جميل مش عارفه اوصف اد ايه هي كانت جميله وخفيفه ونضيفه وست بيت صح
اه وكانت ممشوقه القوام بيضاء (: تقدس الحياه الزوجيه (.
كانت تقولي ديما (الشغله البدريه منسيه) يعني تصحي بدري تعملي الي وراكي وتخلصي وتقعدي فاضيه المهم بقي جه يوم وتعتبت فيه وكنت انا ساعتها الاجازه جت وروحت عند جدتي وبيحكولي لما جيت انها وقعت من علي السرير ومن يومها مقمتش والغريبه انها في عز اليل لما كانت بتنادي حد ينجدها تتخيلوا كانت بتنادي علي مين؟
كانت بتنادي عليا ودي اكتر حاجه اثرت فيا وتعبتني اوي يعني مفكرتش في حد غير في حته عيله صغيره اللي كانت قريبه منها وهي في المستشفي (احساس صعب لما تحتاج حد ومتلقهوش جمبك ),,,,
المهم بنتها كانت هتجن مين سمكه دي الي مامتها بتنادي عليها وعاوزاها واشمعني طلبت تشوفني بعدها طبعا بس علي مين هو انا اد امن الدوله(:
المهم اخر اسم ندته وهي بتموت كان اسمي وكل ما افتكر ده واني كنت بلعب و مش في دماغي ومش حاسه بيها ولا المها وهي محتجاني اي نعم كنت طفله ومش هعملها حاجه بس انها سابت كل الناس واهلها وبنتها وكانت عاوزاني انا كانت حاجه كبيره اوي حست اني اثرت فيها حسيت اني كنت حاجه مهمه بالنسبه ليها في الوقت اللي انا اكتسبت حجات كتير منها يعني احناالاتنين استفدنا من بعض معنويا اوي وكانت دي اهم عندي من اي استفاده لان دي هي الي بتدوم بجد اتعلمت حجات منها وعوضتها عن حجات كانت مفتقداها ربنا يرحمها يارب
بغض النظر عن الحلويات يعني بس بقي بكسف ,
ولما كبرت وافتكر بضايق اوي اوي
دلوقتي لما بفتكر الكلام ده بفكر واقول اد ايه الانسان لما بيكبر في السن بيكون ضعيف اوي بعد ما كان مهم والحياه والناس والمشاغل وانه حد مهم ممكن اوي يحتاج لونيس او لجليس ان شالله لطفل يملي عليه وقته سعتها مش بيفكر في عمر الشخص اللي قدمه او عقله او او كل اللي محتاجه ميحسش بالوحده او لما تلاقي حد كان حاجه مهمه والزمن وظروف الحياه بتلهي الناس وبيكون مش مرغوب فيه او حاجه تقيله او مش فاضينله بقي ويبدأ كل اللي همه يحكي عن امجاده ويسترجع تاريخ حياته وذكرياته هي دي الحاجه اللي فضله ليه ومش مهمه بالنسبه لاي شخص تاني حتي اولاده اد ماهي مهمه بالنسباله تلاقيه بيلجأ لحد يسمعله ويستمتع معاه بيها ويحسسه بقيمتها ولو كان رجع الزمن بيه هيبقي الشخص ده والحجات دي تفه لكن لما بيعدي العمر بتبقي الحجات دي هي كل حياته
ممكن اوي كلنا في يوم من الايام ان ربنا ادانا العمر نبقي زي الحاجه ملك بس ساعتها يارب تلاقوا حد زي سمكه(: بس متخلصش الحلويات
اوحش شئ في الدنيا الوحده والاحتياج ربنا يبعده عننا كلنا وديما حبيبنا واهلنا والناس اللي بتحبنا واصحابنا حولينا ملين علينا دنيتنا
اول بوست اكتبه وانا ببتسم وحزينه ازاي محدش يساأل
اهم شئ العطاء المعنوي اهم بكتير من العطاء المادي هو الي بيدوم
كفايه بقي صعبنيات وحزننيات لحسن هعيط
بجد كنت بحبك اوي وبحترمك اوي وحسيتك حد مختلف عاش ومات مميز ومفتقداكي اوي واتعلمت منك حجات كتير اوي اوي ولو هكلم عليكي مش هيكفي 100 بوست لان اتعلمت حجات كتير بفضل ربنا سبحانه وتعالي ثم انتي علي فكره اللي بينا مقلتهوش لحد واوعدك مش هقول لحد هووووس بس هقوله لسمكايه الصغيره بس دي بقي هتبقي بنت بنتي او بنت ابني ان ربنا اراد واداني العمران شاء الله امال هرخم علي مين لازم حد من دمي عشان يستحملني
ادعولها ربنا يرحمها
