...

هووووووس ولا نفس

البوست ده مكنش علي البال ده جه كده رغم ان كان في دماغي حجات كتير ملخبطه غير الخبط والصداع بس ده قلت لازم اكتبه كنت من فتره كده اسبوع ولا اسبوعين قاعده فاضيه بليل بقلب في القنوات وحاطه رجل علي رجل وفضي بقي بعيد عنكوا ومفيش ولا قناه عجباني وعماله العب في شعري واتقلب يمين وشمال وتوء ومش توء وبغير جبت علي lbcلقيت البرنامج اللي انتوا عارفينه ده ستار هباب ولا سنه ومن السنين استهواني او تبعته المهم سبت القناه ودخلت اجيب ترمس كنا باين شاحتينه ولا معرف سارقينه منين ورجعت اتهبدت علي الكرسي ومددت وببص لقيت هبل ما بعده هبل وانا باكل الترمسه نزلتها من علي بوقي ببطء وبحلقت واتعدلت وربعت كده وسبت الترمس بقي لقيت ستار ده اتغير خالص بقت البنات والولاد اللي فيه عرب طبعا واخدين بالكوا بيهزروا مع بعض ودلع ورخاااامه وتقل دم مشوفتش كده لا وحب في بعض عيني عينك كده ولقيت حجات بجد مستفزه الاقي بنت داخله اوضه الشباب بتصحي برعي من وسطهم ياحلاوتك يابيضه وواحد زانق بت تانيه وبيهزر معاها هزار سخيف وبيحبوا بعض ولقيته والله زي ما بقلكوا كده بيضربها بالشلوت بهزار وقالتله انا ما بحب هيك هيك ايه وبيك ايه علي شبابك يامنيله ده انا بقول لو انا مكانها كانت جريت جريت جريت وهووب عملت زي اللمبي وعملت زي القط الي كان بيقلد صوته هو وياسمين وهي بتأكله وكنت بقي خربشت مامته يعني لامؤخده هزار بهزار بقي وده دلعي
انا اللي جه في بالي وقتها بجد الدنيا كلها بتشوفهم والحج بابي والحاجه مامي وموقف الاخ المحترم واخته عسل كده في وسط الشوباب بجد احساسهم ايه احنا عرب! طب احنا مسلمين! طب ده لو علي ايام الرسول وسيدنا عمر لو شافهم مش كان كربجهم ولسوعهم علي ضهر ايديهم ده لو كان عمل كده بس اصلا
وواحد في برنامج تاني بيكلم بنت في التليفون علي الهوي كده وادام الناس وبيفصحوا عن مشاعرهم كان برنامج شويه شباب وشويه بنات واتنين يحبوا بعض ويتجوزا يفوزا مش فاكره ده اسمه برنامج ايه ده كمان وكلام عبيييط وهل هي المشاعر بقت رخصيه للدرجه دي واي حد يشبط مع اي حد ولو منفعش ندور علي غيره عشان نكسب!
ونستهبل علي بعض ونحب في بعض ادام الناس
انا متهيقلي ومؤمنه اوي ان المشاعر دي زي بظبط الهدوم الجوانيه اوي ورور كده يعني ياجماعه محدش يشوفها غير الشخص نفسه لانها ملكه هو بس حاجه خاص بيه يعني المشاعر حاجه خاصه جدا ممكن شخص واحد بس اللي يعرفها وهو في حاله واحده هي الحلال اللي من حقه يشاركك فيها طبعا مش الهدوم اللي يشاركك لالالا دي المشاعر اه منستهبلش فاكرين زمان وافلام زمان وحسن ونعيمه والخجل والكسوف وي وياكسوفي سي عوض يوه يادي الكسوف سي برعي يالهوي وتحط اليشمك علي وشها بدلع كده انا خجلانه منك والي يرمي جواب ويجري والبت معرفش تعمل ايه ووشي منك في الارض ياخاله امونه واللي يتابع حد من بعيد ويقعد سنين وسنين بس عشان يشوفه من بعيد ده امله الوحيد كان الواحد بيتفرج علي افلام عربي بتاع زمان ويموت من الضحك لا بس والله كان في ناس فضايح اكتر من دلوقت والحب في الدره علي كيفك يعني في كل زمان ومكان اسكتي استكي ياسمكه بلاهم
في ناس جميله بتعبر عن الحب في كتابتهم في المدونات وكلام جميل جدا ومشاعر بريئه وممكن اوي تكون عن تجربه شخصيه وممكن بردو تكون من غير اي تجربه كنت زمان فاكره اللي بيكتب رومانسي دمه تقيل واتريق فكرتي اتغيرت تماما لما دخلت عالم التدوين لقتهم ناس دمها خفيف ومثقفه ومحترمه وبتعبر عن كلام جميل في صوره كتابه ومشاعر رقيقه مش اكتر
وفي ناس هتعترض علي كلامي اللي في الاول وتقول دي حريه شخصيه علي موضوع القنوات دي وناس تقول ان ده مش حرام انا مقلتش ان الحب نفسه حرام بس في حاجه اسمها العفه وفي كمان حاجه اسمها الحياء ومش ادام الناس كده والهبل اللي بنشوفه في القنوات وهما لا مراته ولا زوجهاولا اي حاجه عشان يتغفر لهم ده حتي لو كان كده بردو علي عينك ياتاجر بردو ميصحش احنا مش حيونات زي القطط في قلب صناديق الزباله ياشيخ انت وهي بلاش كلام فارغ وكمان في حاجه اسمها انه مش شرط بين رجل وامراه لا انا في دي بشجع اوي ان الناس تعبر عن مشاعرها لكل اللي حوليها سواء صديقه او صديق او اب او ام او اخ اي علاقه انسانيه بتفرق اوي فعلا والكلمه الحلوه صدقه وبتغير شخصيه الانسان وكمان بتديله امل وثقه في نفسه وحياته بيها بتبقي احلي ونفسيته بتتغير من النقيض للنقيض بس بجد اللي بشوفه دلوقت علي قنواتنا الحبيبه حاجه تحزن مش هنقول ان الواحد خلاص مفيش زيه وملاك لا ء كل واحد فينا في عيوب وفيه حجات ممكن اوي اللي قدامه متعجبوش بس في حجات الكل بيتفق عليها والكل بردو بيختلف عليها ودي حريه شخصيه بس انت حر مالم تضر بس ده بيضر اوي اوي اوي
سبكوا من ده كله في حلو وفي وحش اللي عجبني اني فكرت من فتره بقول طب ليه مفيش قنوات تحارب القنوات دي وتظهر شباب فعلا عاقل ومثقف وتبين ان مش احنا بقينا كده وشببنا بقي هايف للدرجه ياريت يعملوا برنامج زي ده بس تكون اهادفه اهداف تنمي وحاجه تشجع مش هبل وغني ومسخره وقله حيا ونستفيد كلنا وحاجه ليها هدف تفيد البلد والمجتمع المهم من كام يوم لقيت برنامج جديد لعمرو خالد اسمه المجددون معرفش هو بيتكلم عن ايه بس واضح انه زي فكرتي دي وشديت اختي من شعرها خلتها تجري بصي يابت بصي زي ما كنت بفكر الناس دي بتاخد افكاري كده بسرعه يوه وبقيت فرحانه هو باين يا كل يوم او كل يوم اتنين علي المحور الساعه 6 او 7 بس برنامج جميل انا اعتقد كده ان شاء الله فبقول لسه في امل الي يعرف الموعيد ياريت يقول
انا لو ليا سلطه علي القنوات دي كنتت مسكت المسؤلين عنها كهربتهم ومسكت البنات مش عارفه بصراحه مش هقلكم كنت عملت فيهم ايه والشباب بردو سبوني اخترعلهم تعذيب يليق بالهيافه بتعتهم ربنا يصلح الحال ان شاء الله
كل اللي عاوزه اقوله اني عاوزه اتابع برنامج المجددون واشوف بيتكلم عن ايه واكيد هنستفيد وكلنا ان شاء الله انا متهيقلي كده علي الاقل حاجه مفيده مش اديني في الهايف وانا احبك ياننس لا كده ازعل
استاذ عمرو خالد رجل محترم وليه فكر وشباب كتير بتحبه وبتثق فيه وهو انسان محترم يستحق الثقه
وشكرراااااا