ورده واحده بألف معني

بقالي فتره محتاره في المقدمه وكل مره اقول زمان ومش زمان لا انا هدخل في الموضوع علي طول الله! مش دي مدونتشي ولا ايه؟
بردو هقول زمان

وقول للزمان ارجع يا ايه؟(:
بما اننا يعني داخلين علي الربيع والورود افتكرت وانا صغيره كان جدي الله يرحمه ليه طقوسه الخاصه بالايام دي كان الراجل ده رومانسي رومانسي اخر حاجه الله يرحمه
كانت اول كلمه لما يشوفني جايه عليه يفتح درعاته اهلا اهلا بست البنات( واخدين بالكوا من الكلمه كان المفروض يقول ست ابوها او ست الحته او ست الدار بس ياله )ويروح قايل

متحبيني نوبه
اقوم انا بقي ايه؟ حباه امال ايه منا مش قليله الاصل بس كنت اقف عند كلمه حبيني نوبه؟
يعني بوسيني من الاخر هاتي بوسه طب هو الراجل ده احبه ازاي يعني طب منا بحبه
ونوبه كمان يعني مره وبعد كده خلاص ابطل حب فيه؟ اكره يعني
عجيب عجيب
بس فهمتها بقي بقيت تلقائي حبيني نوبه يعني امووووه
فكنت بيني وبينكم بحبه كذا نوبه (وش بيغمز)
كان بياخدني بقي وامسك في ايده وادام البيت الكبير زارع شجر ورد ونعنيع وحجات معينه ورود مختلفه في الجونينه كان دماغ الراجل ده ياخدني من ايدي انا واختي ويقطف كام ورده حمره وحوليهم نعنيع علي شكل بوكيه جميل صغنتوت وفي وقت مهو بيقطف ورد اقطف انا من وراه برتقال ويوسفندي وهو اخضر زي الحرميه عشان لو شافني هيزعل مني عشان لسه اخضر وانا بحبه اكله اخضر فكان هو يقطف ورد وانا اقطف برتقال امال يعني اقف ساكته
الورد زمان كان ليه ريحه ,الجو كله رحته بتبقي مميزه ورد بلدي بلدي زي مابيقولوا كده ريحه نسمه الصيف وانا بموت في كل ما هو بلدي وبعد كده يبوسني علي راسي بقي ويدهولي وبقيت عيال عمي كانوا بيلعبوا بالكوره والعجل وياخدني انا واختي بس فكانت عندي حاجه كبيره اوي ويقعدني علي رجله وانا بقي اطوح في رجلي رايح جي واغيظ بنات عمي بس من تحت لتحت والف ايدي التانيه حولين رقبته واحط رجل علي رجل واقوم بيساه في خده اقصد حباه وعيني علي بنات عمي ببقي ملوحه وعيني بتبص بجمب كده وانا ببوسه عشان اشوف العيال بتبص ولا لاء عشان يعني اغظهم ونقعد بقي نحكي مش فاكره كنت برغي كتير معاه في ايه اللي فاكره انه كان يضحك علي كلامي ويطبط عليا شكلي كنت بقول كلام ابيح ولا ايه مش متذكره بصراحه(وش مكسوف) المهم اختي كانت تقوم تكمل لعب وانا اقعد معاه
ده اول شخص حببني في الورد هو جدي ابو بابا

الشخص التاني من نايحه ماما هو خالي
كنت بردو اي مكان بياخدني معاه فيه وامسك في ايده بردو امال اتوه يعني؟
كنت قزعه وكنت بجيله لحد ركبته وكان بيبقي ماشي مثلاوواحد صحبه او اي حد ومشغول اوي اوي وبيتناقشوا في مواضيع مهمه ولوك لوك وانا ماشيه جمبه لا بجري جمبه عشان خطوتهم اكبر من خطوتي فكنت بهرول واشتم في سري بقي منا تعبت براحه ياجدعان انا طفله مش كده يعني وسعات استهبل واقول رجلي بتوجعني عشان يشلني ملحوظه (رجلي عمرها ما وجعتني انا كنت بحب اتشال بس(:)او يشلني علي كتفه وامسك في راسه وسعات بقي لما ببقي ماسكه في ايده وهو مشغول جدا ابص الاقيه ساب ايدي وساب الراجل اللي بيتكلم معاه مره واحده من غير مقدمات ووقف عند ورده ويروح قطفها ومدهالي او طالع علي مكان عالي وجايب منه ورد وينزل يدهالي

عارفين بقي الوقت ده كنت ببقي باصه علي الورده دي بذات فلما يجبهالي كانه عارف انها عجباني سبحان الله ومتتصوروش سعتها بقي مدي فرحي ياسلام شوفوا رغم انه مشغول ومندمج يسيب كل ده ويقطف ورده عشاني افرح انا بقي واحس اني ايه ملكه وامشي بعنتظه وامشي ادلع وانط برجل ورجل كده وامسك ايد خالو احضنها فرحانه بقي وهي دي الحاجه الوحيده اللي علي ادي هي ايده وهو يبص تحت وبيبتسملي وقتها ببقي كاني ملكت الدنيا كلها واروح اسمع اغناي بابا فين(: مكنش الاغاني الهبله دي علي ايامنا كانت اغاني لام كلثوم ومكنتش بحبها وبخاف منها زمان

يعني مكنتش بسمع حاجه بلا نيله ده خالي ياجماعه
جدي بقي مات ومعرفش انه علم معايا جدا والموضوع ده اثر فيا
وخالي ربنا يديله الصحه ميعرفش اد ايه ساب اثر ايجابي معايا وحببني في الورد اد ايه والحركه دي كانت بتفرحني ازاي بس الغريب وانا صغيره ان الورد ارتبط معايا او انحسر علي العيله بس يعني محدش يدي لحد ورد غير لو جدو او خالو حد تاني لاء ممنوع
او غريبه لما كبرت وروحت الجامعه كرهت الفعل نفسه مش الورد اي حد يدي لاي حد ورد مش فاهمين معناه ولا اي حاجه رخسوا الورد اوي وهو غالي عليا اد ايه هو رقيق وراقي ومخلوق جميل مش اي حد يحسه ولا يفهمه بقي كده ملطشه وقللوا قمته
وخصوصا بقي في عيد الحب ايام الجامعه تلاقي واحد اهطل منزل بنطلونه بيدي ورده لواحده هطله رافعه البادي وهدومها مش مقضياها وشويه عيال اي كلام بقيت اضايق كنت ببقي عاوزه اجري اخدها منه واضربه علي ايده اقوله بس ياض كخ كده امشي من هنا بلا كلام فارغ
الورد عمره ما انحسر علي اتنين مأنتمين ولا واد بيحب بنت ولا بين رجل وامرأه بشكل عام ده بيمثل جميع العلاقات الانسانيه لما حد يحب يعبر لحد عن مدي حبه ليه او ارتباطه بيه تعبير عن فرحه او تعلقه بيه او اهتمامه بيه او في ظروف معينه يعبر عن نفسه بالورد ده ادام الشخص اللي قدامه سواء فرح حزن بعد ,قرب فراق ,لقي سواء بقي اب لبنته او اخ لاخته او ابنه لمامتها او اي حد بيحب حد اي كان صحاب اخوات

مش شرط يعني ورد احمر يبقي واحد وواحده

والحب الحب والشوق الشوق وبلوبيف بلوبيف

انا كنت بحب اوي الورد الابيض مع التركواز تحس بنقاء ورقي وصفاء واخده بالك ياصفااااء ؟بتحس كده بنعومه وكمان الاصفر هادي ولونه جذاب كده وطبعا طبعا الاحمر ده لوحده حاجه تانيه

بس نفسي اتعلم اعمل لوحدي بوكيه كامل
ايه رأيكوا بفكر افتح محل ورد بس لاهل والخلان بس مش للخلان والاهل اوي يعني لحسن كده مش هيتباع يعني

(وش عينه رايحه جايه)

اللي فكرني بالكلام ده كله من كام يوم كنت ماشيه ولقيت واحد معاه بوكيه ورد تحفه اوي وبيقري ورقه بيدور علي العنوان ووقف ادام فيلا وبيرن الجرس وانا متنحه لحد ما كنت هخبط في شجره وبصراحه كنت بحقد علي اللي مبعتله البوكيه ده عجبني اوي ان حد بيبعت لحد بوكيه ورد لاي مناسبه مش عشان بنشوف كده في الافلام او انه منحسره في طبقه معينه او حد يقولك دي الناس الرايقه او الفاضيه او تعالو شوفوا المشاكل هو احنا لاقين ناكل لا انا بحس ان الانسان اللي بعمل كده مميزومختلف وحد بيفهم اوي مش بيتنحنس مهو مش اي حد بردو ولا في اي وقت وليه ظروفه ومناسبته
ومش شرط بوكيه من محل ورد مشهور ممكن اوي تبقي ورده مقطوفه من عشجره اجدع الف مره من بوكيه من اغلي محل ورد

المهم

الاحساس نفسه والمعني

الورد بيحمل معاني كتير

اوي

ليه الف معني ومعني

ولا اييييييييه؟؟؟؟؟